Яратмишзавай касдин — шаирдин, гьика­ят­чидин мурадрикай сад вичи теснифзавай эсерар газетдин, ктабдин, манидин куьмекдалди халкьдив агакьарун я. Гьайиф хьи, чIалар, гьикаяяр, махар, кьисаяр теснифзавай вири­даз ахьтин югъ акунач. Ахьтинбурукай сад чи халкьдиз хъсандиз чизвай Ашукь Ширин­  (фияви) я. Вичин бязи чIалар ада чуьнгуьрдин сесерихъ галаз манийралди жемятдив ага­кьарнатIани, бязи шиирар милли газетдиз акъатнатIани, адаз вичин эсеррикай ибарат ктаб акунач. И гъалатI, устад ашукь рагьметдиз фейидалай инихъ 25 йис алатайла, Ширинан хва Айдуна, писатель, таржумачи Мурад Саида туькIуьр хъувуна, алай йисуз ашукь Ширинан «КIанда заз…» ктаб акъудна.

Ана  шиирар лезги ва урус чIаларал ганва. Къейд авун лазим я хьи, ктаб гьазурунин, эсерар урус чIалаз таржума авунин жигьетдай Мурад Саида еке зегьмет чIугунва. Адаз баркалла!  Гзафбуруз фияви Ширин анжах ашукь хьиз малум тир. Гила ам чи вилик шаир хьизни акъвазнава.

Ктаб пуд патал пайнава. Сифте паюна­ ватандашвилин ва диндин шиирар ганва. КIел­за­­вайдан гуьгьуьл ачухарзавай, руьгьдик юзун кутазвай, автордин кьатIунрихъ, фикиррихъ галаз рейсад ийизвай эсеррик «Ватан», «КIанда заз», «Фияр», «Шезва Ширин», «Кьуьчхуьр Саи­даз», «Афгъанистан», «Дидедин сурал» акатзава.

Муьгьуьббатдиз ва тIебиатдиз талукь паюна гьатнавай эсерра ашукьди михьи, вафалу, руьгь шадардай гьиссерикай кхьенва.

Яр такурла жуван патав,

Самур вацIни рагъул жезва.

Кар авачиз мичIизва тав,

Гуьгьуьл хана, сугъул жезва.

(«Муьгьуьббатдиз авач къимет…»

Пуд лагьай пай ашукь Шириназ бахшнавай шииррикай  ибарат я. Ашукьар тир Нисреда, Османа, Айдуна, Шемшира, гьакIни Ханбиче Хаметовади, Римма Гьажимурадовади, Шихмурад Шихмурадова, Мердали Жалилова, Мурад Саида ва масабуру Фияр Ширинан хайи муг тирди, ашукьдин инсанвилин гуьзел ерияр, адан устадвал, сесинин везинлувал, милли искусство вилик тухуник ада кутунвай пай къейд­нава.

Ктабда Мурад Саида ашукь Ширинан уьмуьр­дикай малуматар, яратмишунриз къимет ганва. 1937-йисуз дуьньядиз атай Ширина Фиярин колхозда, ахпа культурадин кIвале зегьмет чIугуна ва ашукьвилин искусство вилик тухвана. Гзаф сеферра халкьдин вилик чуьнгуьр хураллаз экъечIна, конкурсра, фестивалра иштиракна. Гьа са вахтунда веледриз дуьзгуьн тербияни гана. Ашукьдин рехъ къе адан рухвайри давамарзава.

Халкьдин рикI алай ашукь 1999-йисуз рагьметдиз фена. Амма адан манийри сегьнейра, чи рикIера ванзама.

Абад  Азадов