И йикъара Кемерово шегьерда кикбоксингдай кьиле фейи Россиядин чемпионатда уьлкведин 55-дав агакьна регионрай тир, санлай къачурла, 550-дав агакьна спортсменри иштиракна. Ана чи ватанэгьли, Сургутда яшамиш жезвай Рустам Мирзоева (84 кг-дал къведалди заланвал авайбурун арада) «Лайт контакт» жуьредай къизилдин медаль, Россиядин чемпионвилин тIвар къазанмишна. Къведай йисан эвелра ада, Россиядин хкянавай командадик кваз, Белоруссияда кьиле фидай международный турнирда иштиракда.
Шадвилелди мадни а кардикай хабар гуз кIанзава хьи, гила уьлкведин чемпионвилин тIвар Р. Мирзоева 5-сеферда къазанмишнава. Чи ватанэгьлидихъ спортдин рекье агалкьунар мадни ава. Ам Россиядин ачух Кубок патал акъажунрин, гзаф кьадар международный турниррин гъалибчини я. Ада 10 йисалай виниз вахтунда жаван гадайризни рушариз кикбоксингдин сирер чирзава. И йикъара РФ-дин спортдин министерстводин приказдалди Рустам Мирзоеваз Россиядин спортдин международный классдин мастервилин тIвар ганва.
Рагнеда Рамалданова
