Шак фенвайди кьунва
Къарабудахкент райондин полициядин къуллугъчидиз махачкъалавиди вичин чилин участокдал алай эцигунрин материалар чуьнуьхнавайдакай хабар гана.
39 йисан яшда авай махачкъалавиди хабар гайивал, Зеленоморск хуьре авай вичин участокдилай 47 йисан яшда авай азербайжанвиди 2 миллион манатдин къиметдик квай эцигунрин материалар чуьнуьхна.
РФ-дин УПК-дин 91-статьядин бинедаллаз кьур шак фенвайда полицейскийдиз хиве кьурвал, ада Зеленоморскда авай чилин участокдин иесидиз кIвал эцигна, амма авур кIвалахдин гьакъи ганач. Пул тагайла, устIарди эцигунрин материалар вичиз вахчун ва абур маса гун кьетIна. И жуьреда ада вичин зегьметдин гьакъи «эвез» хъувун дуьз кар яз гьисабна.
Эхиримжи вацра ада объектдилай ракьун дестекар, арматура ва маса затIар тухвана, металлобазадин къуллугъчийриз маса гана.
Чуьнуьхай затIар вахчунвач. Арадал атай пул устIарди вичин хсуси игьтияжар патал серфна. Ихьтин гьаларихъ галаз рази тахьай иесиди полициядиз арза авуна.
РФ-дин УК-дин 153-статьядин 3-паюнай (угъривал) уголовный дело къарагъарнава.
Нагьакьан гафарай — гъуд цава
Акуша райондин полициядин къуллугъчийри чкадин 2 агьалидин арада хьайи къалмакъалдай кьил акъудзава.
Малум хьайивал, Дубримахи хуьре 29 йисан яшда авай жегьилди 41 йисан яшда авай хуьруьнви гатана. ТIарвал хьайи агьали азарханада къаткурна.
Полициядин отделдиз хкай шак фенвайда хиве кьурвал, азарханадиз аватайда са кьадар вахт идалай вилик адакай нагьакьан гафар лагьана. И кар себеб яз, абурун араяр лап къана.
Дуьшуьшдай сад-садал гьалтайла, абуру чпин «гъутарин алакьунар» ахтармишна. Къалмакъал хьайи вахтунда сада муькуьдан чиниз са шумуд гъуд вегьена.
Тахсиркарвилин лишанриз килигна, РФ-дин УК-дин 112-статьядин 1-паюнай уголовный дело къарагъарнава.
«Лезги газет»
