РД-дин эцигунрин, архитектурадин ва ЖКХ-дин министерстводи агьалийри ихтияр авачиз эцигнавай кIвалер (дараматар) къейднавай интернет-порталдикай менфят къачудай мумкинвал ганва. «Гила и кардиз итиж ийизвай гьар са касдивай республикадин мулкунал гьи объектар законсузбур яз гьисабзаватIа чириз ва и кар патал www.samovol.e-dag.ru сайт ачухиз жеда. Законсузбур яз гьисабзавай вири объектар ина са картадал майдандиз акъуднава. Портал Дагъустандин Кьил Сергей Меликован теклифдалди, законсуздаказ эцигнавай объектар винел акъудунин ва гьисабдиз къачунин Сад тир сиягь гьазурунин сергьятра аваз, арадал гъанва», — хабар гузва идаради.
Картада «РосКапСтрой» ФАУ-дин пешекарри ахтармишнавай 467 объект яру рангуналди къейднава. Вили ранг алай объектар сифтегьан ахтармишунар тухвайдалай кьулухъ дуьздал акъуднавайбур я.
Гьелелиг картадал къейднавай чIехи пай объектар Махачкъала шегьердал гьалтзава. Министерстводи хабар гузвайвал, муниципалитетра кIвалахзавай инспекторри картадал инсанри ихтияр авачиз, яни законсуздаказ эцигнавай дараматрин гьакъиндай малуматар (объект алай чка, адаз талукь ихтиярар, шикилар авани, авачни) алава хъувунин кIвалах давамарзава.
Идахъ галаз сад хьиз, делилар цIийи кьилелай ахтармишунин кIвалахни датIана кьиле тухузва — ида гъалатIрикай, гьа са дараматдиз талукь малуматар тикрар хъхьуникай кьил къакъуддай мумкинвал гуда. Интернетда авай карта ишлемишзавайбуруз къулайвал патал ам маса къуллугърихъ (месела, 2ГИС) галаз алакъалу авунин месэладиз килигзава.
И кам, гъавурда твазвайвал, юзан тийидай эменнидин объектар маса къачун ва я эцигун пландик кутунвай агьалийривай и кар законлудаказ, ачухдаказ ийиз жедайвал къачунва. Гила инсандивай, объект маса ва я кирида къачунин гьакъиндай къарар кьабулдалди вилик объектдин гьакъиндай эхиримжи делилар ахтармишиз, адаз талукь вири делилар виликамаз чириз жеда.
Жасмина Саидова
