2024-йисан 9 вацран вахтунда Дагъустан Республикадин гъвечIи ва юкьван карчивилин карханайри (МСП), санлай къачурла, 12 миллиард манатдин кредитар къачунва. Им, алатай йисан гьа и вахтунив гекъигайла, 20 процентдин гзаф я. Са йисан вахтунда банкарин вилик карчийрин мажбурнамаяр, хабар гузвайвал, тахминан 60 процентдин, я тахьайтIа, 8 миллиард манатдин гзаф хьанва ва, 2024-йисан1-октябрдин делилралди, 21,2 миллиард манат тешкилнава.
«Кьезилвилер гузвай программайри гузвай мумкинвилер ва республикадиз къвезвай туристрин кьадар гзаф хьунин шартIара кьилдин ксарин яшайишдин кIвалер эцигуниз ийизвай игьтияж гзаф хьунин нетижада гъвечIи ва юкьван карчивилин субъектриз гузвай кредитрин кьадар виниз акъатна. Ихьтин дуьшуьшрал банкари алай йисан 9 вацра региондин бизнесдиз ганвай кредитрин 80 процент гьалтзава. Нетижада, октябрдин эвелдин делилралди, карханайри къачунвай кредитрин арада МСП-дин пай иллаки екеди — 50 процент хьанва. Са йис идалай вилик и делил 38 процентдиз барабар тир», — лугьузва Россиядин Банкунин Дагъустанда авай отделенидин регьбердин заместитель Светлана Бацинади.
Санлай къачурла, Дагъустан Республикада карханайри къачунвай кредитрин кьадар 18 процентдилай гзаф виниз фенва ва, 2024-йисан 1-октябрдин делилралди, тахминан 42 миллиард манатдив агакьнава. Виридалайни чIехи пай ина гьялдай промышленностдин, эцигунрин ва хуьруьн майишатдин хилерин карханайрал гьалтзава.
Жасмина Саидова
