“Дагъустан” ГТРК-дин журналистри Россиядин Игит Зейнудин Батманован уьмуьрдин рекьиз, кьегьалвилиз талукьарнавай “Своих не сдаем. История лесника” (“Жуванбур маса гудач. Тамухъандин тарих”) тIвар алай фильм арадал гъанва.
22 декьикьада давам жезвай фильмда Кьурагь райондин КIирийрин хуьряй тир мешебегидин хизандикай, кIвалахдикай, алакьунрикай ихтилатзава, адан игитвиликай жуьреба-жуьре инсанри чпин фикирар лугьузва. Абурун арада РД-дин Кьилин везифаяр вахтуналди тамамарзавай Владимир Васильев, Росгвардиядин РД-да авай Управленидин начальник Мегьамед Баачилов, РД-дин МВД-дин министр Абдурашид Мегьамедов ва масабур ава. Фильмдиз Интернетда видеойрин “YouTube” хостингда килигиз жеда.
РикIел хкин, гражданвилин буржи тамамардайла, къалурнавай жуьрэтлувиляйни кьегьалвиляй, РФ-дин Президентди 2018-йисан 8-майдиз акъуднавай Указдал асаслу яз, Батманов Зейнудин Лукьмановичаз, кьейидалай кьулухъ пуд йис алатайла, Россиядин Федерациядин Игитвилин тIвар гана.
«Лезги газет»
