И йикъара Сулейман-Стальский райондин кьил Нариман Абдулмуталибов Кьасумхуьрел III Интернационалдин куьчеда кIвал кайи чкадал фена. Идакай “Лезги газетдиз” райондин муниципалитетдин пресс-къуллугъдай хабар гана.

Малум тирвал, Эльмира Мегьамедовадин кIва­ли алай йисан 11-августдиз, виликамаз авай малуматралди, газдин пичинал гьазурзавай хуьрек кун себеб яз цIай кьуна. ЦIу вири эменни та­хьай мисална. Гьайиф хьи, кIвал къайдадиз хкиз хъжедай гьалда авач. Гена инсанриз хасаратвилер хьанач.

Райондин кьили хуьруьнвийриз кьве йикъан вахтунда 300 агъзур манат кIватIунай, идалди мергьяматлувал къалурунай ва гьарайдиз гьай лугьунай чухсагъул малумарна. Нариман Абдулмуталибова Эльмира Ме­гьамедовадиз жедай куьмекар гун районэгьлийривайни тIалабна, вичини куьмекдайдахъ инанмишарна. Ада къейд авурвал, кьилинди гена инсанриз зарар хьанач. “Ихьтин дуьшуьш гьар садан кьилел атун мумкин я. За агьа­лийриз мергьяматлувал къалуруниз, дарда, кIеве гьатнавайдаз куьмекдин гъил яргъи авуниз эвер гузва. Чарадан тIалдикай хабар кьун-им руьгьдин виниз тир ерийрин лишан я”, — алава хъувуна райондин кьили.

РикIел хкин: алай йисан 18-январдиз КIвар­ча­гъа яшамиш жезвай Тават Бабаевадин кIвал михьиз канай. Гуьгъуьнин юкъуз На­риман Абдулмута­либов чкадал фенай ва Тават Бабаевадиз куьмекдин гъил яргъи авунай. Бабаеврин хизандиз “Корчагский сельсовет” по­селенидин администрацияди, хуьруьнвийри ва мергьяматлувилин “Инсан” фондунини куьмекнай. Нетижада 4 вацралай тIимил вахтунда Бабаеврин хизандиз гьа виликдай хьтин 56 квадратный метрдикай ибарат кIвал эхцигнай.

Зарар хьанвай ксарихъ ва абурун къуншийрихъ­ галаз рахадай вахтунда Н.Абдулмуталибова  цIаяри­кай хуьниз талукь къайдайрал амал авуниз, мукъаятвал артухаруниз, эменни страховатуниз эвер гана.

Мергьяматлувилин “Инсан Касумкент” фондуни­ М­е­гьамедоврин хизандиз 400 агъзур манатдин кьа­дар­да аваз пул кIватIзава ва чарадан тIалдикай хабар­ кьа­дай гьар са касдивай и ксариз куьмек гун тIалаб­зава.

Реквизитар:  4276 8600 3143 2475

Тел:  8- 960- 411- 46- 11

«Лезги газет»