Пул къакъудунай шак физва
Къарабудахкент райондай тир дишегьлиди вичин хуьруьнвиди гужуналди вичивай пул къакъудзавайдан гьакъиндай полициядиз арза авуна. Идакай РД-дин МВД-дин пресс-къуллугъди хабар гузва.
Шак физвайдан 35 йис я. Полициядин отделдиз хкайла ада ихтилат авурвал, са шумуд вацра арзачидихъ галаз ада интернетдин куьмекдалди алакъа хуьзвай. Йикъарикай са юкъуз агьалиди дишегьлидивай 50 агъзур манат пул вичиз ракъурун истемишна. Вичин истемишунар кьилиз акъуд тавуртIа, гъиле авай «компромат» вирибуруз раижда лугьузвай. Пехирар дуьздал акъудда лугьуз, гьелягьар кьурдалай кьулухъ къурху акатай дишегьлиди 5 агъзур манат пул ракъурна, гуьгъуьнлай ам полициядиз арза ийиз фена.
* * *
Гужуналди гзаф кьадар пул къакъудиз кIан хьайи дуьшуьш полициядин къуллугъчийри Избербаш шегьердани дуьздал акъудна.
28-36 йисан яшара авай кьуд итимди ва 31 йисан яшда авай дишегьлиди, виликамаз меслят хьуналди, 39 йисан яшда авай агьалидивай пул истемишна, акси дуьшуьшда, адакай нагьакьан малуматар чукIурда лугьуз, гьелягьар кьаз хьана.
Шак физвайбуру 39 йисан яшда авай агьалидивай 900 агъзур манат пул истемишзавай. И пулуникай са кьадар такьатар шак фенвайбурув вугудай чIавуз абур вири полициядин къуллугъчийри кьуна.
РФ-дин УК-дин 163-статьядин 2-паюнин «а», «г» пунктарай уголовный дело къарагъарнава.
«Лезги газет»
