Юзан тийидай эменни маса къачурла, авур харжарин са кьадар пай государстводи эвез хъийизва. И кар кьилиз акъу­дун патал юзан тийидай объект маса къачунвайда эменнидин налогдин вычет туькIуьрун герек я.

Элкъвена вахкузвай такьатрин кьадар маса къачур кIвалин къиметдин 13 процентдикай ва ипотекадай гайи процент­рин 13 процентдикай ибарат ­жеда.

Къанундал асаслу яз, элкъвена вахку­дай такьатрин кьадардин вини кьил 2 миллион манат я (кIвалин къимет патал), ипотекадин процентар патал — 3 миллион манат.

Эгер маса къачунвай кIвалин къимет 2 миллиондилай ужуз яз хьайитIа, эвездин такьатар гьакъикъи къиметдин 13 про­центдиз барабар жеда. Ихьтин дуьшуьш­ра, талукь тир эвездин такьатрин (вы­чет) амукьзавай пай мад сеферда кIвал маса къачурла вахчуз жеда.

Такьатар вахчун патал герек я:

— РФ-дин налогрин резидент яз хьун;

— вичикай НДФЛ кьазвай къазанжи къачузвайди хьун;

— маса къачунвай кIвалин сагьиб я лагьай документ (ихтиярар) туькIуьрун.

Эвез яз 13 процент такьатар вахкун тийизвай дуьшуьшарни ава. Алава малуматар агьалийривай мукьвал алай МФЦ-дин идарадай чириз жеда. Эвездин такьатар вахчун патални МФЦ-диз ихьтин документар гваз фин герек я:

— паспорт;

— юзан тийидай объектдин сагьиб я лагьана тестикьарзавай документ;

— маса къачунин-гунин икьрар;

— кIвалахзавай чкадай алай йисаз талукь НДФЛ-дин жуьредин справка.

________________________________________________

Гзаф йисара къуллугъ авунай гузвай пенсия

Гзаф йисара къуллугъ авуниз килигна тайинарзавай пенсия — им тайин къуллугъдал ва я тешкилатда герек тир зегьметдин стаж авай ватандашриз гузвай пулунин такьат я. И пенсия яш тамам хьуниз килигна ваъ, гзаф йисара зегьмет чIу­гунвай ксариз тайинарзава.

Ихьтин пенсия къачудайбурук акатзава:

— федеральный госкъуллугъчияр (гражданский);

— Россиядин регионрин госкъуллугъчияр (граждансикий) ва муниципальный къуллугъчияр;

— аскервиле къуллугъзавайбур;

— Росгвардиядин, УФСИН-дин ва МВД-дин къуллугъчияр;

— цIаяр хкадардай къуллугъчияр;

— космонавтар;

— цавай лув гунин (самолетра) хиле кIвалахзавайбур.

И пенсия винидихъ къалурнавай­ гьар са категориядиз талукь кьилдин шар­­тIа­рин-къайдайрин бинедаллаз тайинарзава­.

«Лезги газет»