Жуьрэтлубур
Мегьарамдхуьруьн райондин администрациядин сайтди хабар гайивал, Украинада кьиле тухузвай дяведин махсус серенжемда гьа сифте йикъалай иштиракзавай районэгьли, лишанчийрин кьилдин полкунин командирдин заместитель Хуршидов Фиридин Саидовичаз и мукьвара РФ-дин Президентдин указдалди Суворован медаль ганва. Идал къведалди ам «Женгера тафаватлу хьунай», Жукован, «Дирибашвиляй» медалрин сагьиб тир. Медаль гунихъ галаз сад хьиз Хуршидован чинни хкажна — ам гила подполковник я.
Фиридин Хуршидов 1981-йисуз Ахцегь райондин Ухулрин хуьре Саид духтурдин хизанда дуьньядиз атана. Ина хизан яргъалди амукьнач. Дагъвияр арандиз куьчардай сиясат себеб яз, Хуршидоварни Мегьарамдхуьруьн райондин ЦIийихуьруьз эвичIна. Ина Фиридин юкьван школадин 1-классдиз фена. КIелиз адаз четин акъвазнач. Чирвилерихъ къаних жаванди художественный ва маса хилериз талукь ктабарни кIелдай. Гьа са вахтунда гада спортдизни мукьва тир. Школа акьалтIардалди, ада дзюдодин секцияда вердишвилер къачуна. Райондин, республикадин турнирра иштиракна, кIвенкIвечи чкаярни кьуна.
1998-йисуз Хуршидов Дагъустандин педуниверситетдин филологиядин факультетдик экечIна. Гьа са вахтунда военный кафедрадани кIелна. Университет акьалтIарунихъ галаз сад хьиз адаз лейтенантвилин чинни гана. Ватандин вилик буржи кьилиз акъуддай вахт алукьна, Фиридин Россиядин армиядин жергейра къуллугъ авунив эгечIна. 2004-йисан майдилай офицерди жуьреба-жуьре частара, чкайра къуллугъна. Уьлкведин регионрай къвезвай жегьилрикай халисан аскерар, Ватан хуьдай кьегьалар авунин карда иштиракна.
Вичи къуллугъзавай мотострелковый дивизиондиз хайи райондай ва гьакI Дагъустандай хейлин жегьилар кьабулна, абурукай халис аскерар, офицерар гьазурна. ЦIудалай виниз ксари исятдани адахъ галаз санал оборонадин министерстводин тапшуругъар викIегьдиз, намуслувилелди тамамарзава.
Хуршидов командир тир полкуни Мариуполь, Лисичанск ва маса шегьерар, хуьрер азад авунин карда жуьрэтлувилелди иштиракна. И куьруь келимади Россиядин армиядин офицердин женгинин гьакъикъи шикил, уьмуьр, гьелбетда, къалурзавач. Эгер чна гьар са женгина, даяхдин (опорный) пунктар къачудайла, абур вахчуз кIанз миллетбазри, телефвилеризни килиг тавуна, сад-садан гуьгъуьналлаз гьужумардайла, шегьеррин гьар са кIвал, куьче фашистрикай азаддайла, чи аскерри чеб гьихьтин хаталувилик кутазватIа, гьихьтин уьтквемвал, дирибашвал, руьгьдин мягькемвал къалурзаватIа фикирдиз гъайитIа, гьар сад игит я. Фиридин Хуршидов вичин аскерарни галаз ихьтин хаталу женгерай, агьвалатрай гзаф сеферра экъечIна. Гьар сефердани ам аскеррин саламатвал хуьз, телефвилерин кьадар жезмай кьван тIимилариз, аскеррин къайгъударвал ийиз алахъна. Гилани гьакI я. Исятда гъиле авай яракьри командирдиз гьахьтин мумкинвални гузва.
Кьве йисни зура Фиридин Хуршидова иштиракай вири женгерикай кхьейтIа, кIелдайбуруз пара таъсирдай, чи аскеррин викIегьвилел, жуьрэтлувилел гьейранвалдай ктаб, и вахтунда ада къутармишай аскеррин сиягь туькIуьрайтIа, ам яргъиди жеда.
Эхиримжи варцара Россиядин армиядин частари Донецкдин Республикадин хуьрер сад-садан гуьгъуьналлаз азадзава. Миллетбазриз фир-тефир чка сал хьанва. Хуршидова къуллугъзавай полкни вилик жергейра ава. Ада, гьар юкъуз штабдай агакьзавай тапшуругъар истемишзавай, лазим тир къайдада кьилиз акъудуналди, гъалибвилин югъ мукьва ийизва.
Гьар мумкинвал хьайила, Фиридин Саидович диде-бубадихъ, вичин хизандихъ, багърийрихъ галаз рахазва. Дидедин, уьмуьрдин юлдашдин, аялрин рикIер гьикьван дарих ятIа, абурун хийир-дуьа, мурад квекай, никай ятIа чизва адаз. Гьар сеферда зенг авурлани, лугьузва: «Вири хъсан я. Зун саламат я. Куьне куьн сефилармир, рикIиз дарвал гумир. Гъалибвал яргъал алач…»
Хизанди, аялрини адаз къуватар гузва. Хцини руша школада хъсандиз кIелни ийизва, спортдални машгъул жезва. Боксдай ва каратэдай тешкилзавай турнирра кIвенкIвечи чкаяр кьазва ва чпин агалкьунралди дах шадарзава.
Филологдин образование къачунвай офицерди датIана дидед чIалал акъатзавай литературадиз, изданийриз, милли музыкадиз итиж ийизва. Отпускдиз хтайла вичив гваз ктабар, газетар, лезги манийрин дискар хутахзава.
Аллагьди хуьрай Ватандин итижар патал махсус серенжемда авай вири рухваяр!
Хийир Эмиров
