Гьар йисан 3-декабрдиз чи уьлкведа Малум тушир аскердин югъ къейдзава. 2014-йисуз РФ-дин Госдумади къарар кьабулуналди тайинарнавай лишанлу и йикъан макьсад советрин ва Россиядин девирра уьлкведин мулкара ва я адалай къеце кьиле фейи женгерин серенжемра телеф хьайи ва чпин тIварар тарихда малум туширбур яз гьатай аскеррин экуь къаматар рикIел хкунихъ, гьа са вахтунда ватанпересвал мягькемарунихъ галаз алакъалу я.
И йикъаз талукьарнавай серенжемар Махачкъалада, Ленинан комсомолдин тIварунихъ галай багъдани, кьиле фена. Ана Дагъустандин жегьилрин крарин рекьяй министерстводин, Вирироссиядин «Волонтёры Победы» общественный гьерекатдин векилри, гьакIни Росгвардиядин Дагъустанда авай Управленидин «Горец» ОМОН-дин ва ведомстводинди тушир охранадин къуллугъчийри, шегьерэгьлийри иштиракна.
КIватI хьанвайбурухъ элкъвена, Росгвардиядин Дагъустанда авай Управленидин ветеранрин Советдин председатель, полициядин отставкада авай подполковник Ильяс Насирханов, РД-дин жегьилрин крарин рекьяй министерстводин «Дагпатриотцентр» ГБУ-дин директор Рамазан Мегьамедов ва масабур раханаW.
Ильяс Насирханова, лишанлу йикъан важиблувал, адан макьсад къейд авунихъ галаз сад хьиз, Ватандин ЧIехи дяведин йисара советрин халкьди къалурай игитвилер, гъалибвал патал чанар къурбанд авуналди, гьамишалугъ тарихда амукьай, амма чпин тIварар малум тушир ксар рикIел хкана.
— Росгвардиядин къуллугъчийри ватандин игитвилерин тарих гьамиша рикIера хуьзва, кьур кьинез уьмуьрдин эхиримжи нефесдалди вафалувал хвейи ксарилай чешне къачузва. Чун ва чи гележег, гъалибвал патал чанар гайи ксарин игитвилер чи рикIелай садрани алатдач, — лагьана И. Насирханова.
Эхирдай кIватI хьанвайбуру Азадвилин аскердиз (Воин-освободитель) хкажнавай памятникдал цуьквер эцигна, са декьикьада кисна акъвазуналди, дявейра телеф хьайибурун экуь къаматар рикIел хкана.
Рагнеда Рамалданова
