29-ноябрдиз Дагъустан Республикадин Кьил Сергей Меликова ачух эфирда агьалийрин суалриз жавабар гудайвал я. И месэладиз талукь яз республикадин общественный деятель, публицист Алюсет Азизханова «Лезги газетдин» мухбирдиз вичин фикирар лагьана.
«Ачух линия» — им республикадин регьберди неинки агьалийриз, гьакI гьукумдин идара ийидай ва муниципальный органрин чIехибурузни чешне къалурзавай, гьукумдин ачухвал тестикьарзавай делил я.
«Ачух линияди» гьукумдиз ихтибар авун артухарзава. Чиновникри кьабулзавай серенжемар виридаз аквадай мумкинвал арадал гъизва. Ида агьалийризни гьукумдин кьиле авайбуру хиве кьунвай крар уьмуьрдиз кечирмишунал гуьзчивалдай мумкинвал гузва. Гьа са вахтунда чпивни гьа карда иштиракиз тазва.
Агьалийрихъ галаз ачухдиз рахуни, суьгьбет авуни республикадин экономикадин, яшайишдин, образованидин ва маса хилера рехъ гузвай кимивилер дуьздал акъудунизни куьмекзава. Авайвал лагьайтIа, инсанрик секинсузвал кутазвай месэлаяр, дердияр гзаф ава. Абурукай бязибурал акъвазиз кIанзава. Сифте нубатда здравоохранение къачун. Ахьтин фикирдал къвезва хьи, здравоохраненидин кьиле авайбур ва и хел гуьзчивилик кутунвай чIехи чиновникар чи чилел Марсдилай атанвай хьиз я. Я абуруз чпи вуч ийизватIа чизвач, я, чиз-чиз, агьалияр наразивилерал гъидай гьалариз рехъ гузва. Хуьруьн майишатдин министерстводикайни гьа икI лугьуз жеда. Эгер министерстводин са шумуд управление агалайтIа, за фикирзавайвал, садазни зиян жедач. Министерстводин кIвалахдин са нукьсан ам я хьи, аграрный республика яз, Дагъустанда некIедин, якIун, магьсулдарвилин продукциядин къиметар лап багьа авунва. Инанмиш я хьи, инсанри гьа и кардиз талукь суаларни гуда.
За вилик сеферда студияда тухвай «ачух линиядани» иштиракнай. Сифтебурукай сада яз, за республикадин регьбердиз суални ганай. Зи суал агьалийри кьил кутазвай крариз куьмек гудай ресурсрин центр арадал гъунихъ галаз алакъалуди тир. Акурвал, республикадин Кьил и месэладин гъавурда хъсандиз авай. Ада лагьайвал, гьахьтин центр арадал гъунив эгечIнава. Гьакъикъатда алатай йисуз ихьтин центр республикада пайда хьанва. ГьакIни региондин регьберди республикада социальный такси кардик кутада лагьанай. Къе меркездин куьчейра гьахьтин таксиди набут инсанриз къуллугъзава.
Мад са месэла. Жемиятдин векилриз гьукумдин ва муниципалитетрин идара ийидай органрихъ галаз гъиле-гъил аваз санал кIвалахдай викIегьвал бес жезвач. Гьавиляй жемиятдин гуьзчивал тухуз алахъзавай дестейриз куьмек гун лазим я. Абуру къарагъарзавай месэлаяр, дикъетдивди ахтармишна, уьмуьрдизни кечирмишна кIанда. Ида вири жемиятдиз менфят гуда».
«Лезги газет»
