И йикъара мад са дагъустанви — Мегьамед Исбакъиев — Россиядин Игит лагьай тIварцIиз лайихлу хьана. Ам СВО башламишайдалай инихъ къагьриманвал вини дережада къейднавай цIипуд лагьай кьегьал я. Идакай РД-дин Кьил Сергей Меликован телеграм-каналда хабар ганва.
Гзаф уьтквем и жегьилдикай РФ-дин Президент Владимир Путиназ гвардиядин майор Денис Диденкоди ихтилатна. Уьлкведин Кьилихъ галаз рахадай мумкинвал хьайила, майорди вич ва багърияр патал са вуч ятIани тIалабнач, ада вичин женгинин юлдаш, Ватан патал чан гайи дагъустанвидиз Россиядин Игит лагьай тIвар гун тIалабна.
М. Исбакъиеван дестеди Херсондин областда женгера жуьрэтлувилер къалурна: суткадин муддатда абуру душманрин 20 бронетехника ва 200-далай виниз миллетбазар тергна. Дагъустандай тир офицердал са шумуд хер хьана, амма дестедиз регьбервал гун давамарна. Нетижада вилик эцигнавай тапшуругъ тамамдиз кьилиз акъудиз хьана. Игит Москвадин патав гвай Мытищидин военнийрин мемориалдин сурара кучукнава.
Дагъустанвидин гьунаррикай майор Д. Диденкоди авур ихтилат В. Путина хушдиз кьабулна.
Сергей Меликова къейд авурвал, Мегьамед Исбакъиевахъ итимвални намуслувал, чIехи руьгь ва ватанпересвал авай. «Офицерди вичин регьбервилик квайбур къутармишун патал чан къурбанд авун игитвилин кар я», — лагьана С. Меликова.
26-ноябрдиз Сергей Меликов Россиядин Игитдин диде Марина Исбакъиевадихъ галаз гуьруьшмиш хьана. Ада хциз Игитвилин тIвар гун мубаракна, адаз хъсан тербия гунай сагърай лагьана.
«Акзвазва хьи, Игитвилин вини дережадин тIвар гуни Мегьамедан экуь къамат эбеди ийида. Квез, Мегьамедан бубадиз, вири хизандизни сагърай лугьузва за. Адахъ галаз санал къуллугъ авурбур, командирар, Президентдин Администрация шабагь вичин сагьибдив агакьун патал алахъна. Чи Верховный Главнокомандующийди хиве кьур вири крар гьамиша кьилиз акъудзава. Игитар тербияламишай дидейриз чна чи патайни шабагьар гузва», — лагьана Сергей Меликова.
Игитдин дидеди хизандиз гьамиша куьмекар гунай С. Меликоваз сагърай лагьана.
Салим Салимов
