Медалар — республикадиз, нетижаяр Федерациядиз. Азарлуйриз — са затIни

Газетдин (39-нумра, 7-чин) сифте кьве колонкадай аквазва хьи, «9-12-октябрдин йикъара Москвада, выс­тавкайрин «Тимирязев Центр» комплексдин майдандал, агропромышленный комплексдин гьафтедин сергьят­ра аваз, Вирироссиядин агропромышленный «Къизилдин зул» XXVI выставка кьиле фена. Аниз агакьарай Дагъустандин вири суьрсетдихъ чпин рекьерай агалкьунар хьана. ИкI, республикади 25 (къизилдин — 15, гимишдин — 9, буьруьнждин — 1) медаль къазанмишна.

Гьа са вахтунда республикада гьеле 1966-йисан апрелдилай 25 йиса­лай гзаф вахтунда къуллугънавай пенсио­нердиз, ветерандиз ганвай яшайишдин­­ кьезилвилерай (харжзавай токдинни газ­дин харжийрай ва, саниз фидайла­­, общественный улакьриз гудай­ гьа­къин­дай)­ тайинарнавай пул гузвач­. Лу­гьузва хьи, къе вун инвалид (набут) я. А пул ваз къвезвач. Себеб 2004-йисан 29-декабр­диз Дагъустанди кьабулнавай­ за­конди­ заз къалурнавай кьезилвилер­ яшамиш­ жезмай кьван девирда тайи­нар­на­ватIа­ни, чи республикада и мес­эла чпиз талукь тир са бязи районрин идараярни, министерствони, гьа ихьтин месэлайрал чпи гуьзчивал тухун лазим тир гзаф прокурорарни пенсионердиз къалурнавай пул къачунин терефдарар я. Вучиз?

Мадни. Республикада йиса са сеферда, сентябрдиз, уьзуьрар фикир­да­ кьуна, герек дарманрин сиягь туь­кIуьрзава ва абуралди къведай йисалай поликлиникаярни аптекаяр инвалидриз пулсуз гудай дарманралди таъминарзава. Амма абур гузвач. Яни, азарлудаз пешекар духтурди меслят къалурзавай гьар са дармандалди таъмин туш чи республикада поликлиникаярни аптекаяр. Вучиз?

Мадни кьве суал. 1) Гьукуматдин къуллугъчиди, вичин къуллугъдикай менфят къачун яз, халкь «алажзава». Са вахтарилай адан уюнар дуьздал акъатзава, раиж жезва, законсуз амалралди кIватIай пул адавай вахчузва, а кас вични жазаламишзава. Вучиз пул республикадинди яз амукьзавач?

2) Чун са уьлкведа (Россия, Вирироссия, Урусат) яшамиш жезвай агьалияр я. Къуллугъарни (муаллим, духтур ва масабур), кIвалахдин вахтарни (сятер) сад хьтин кьадардинбур я, амма мажибрин арада Махачкъаладани Москвада тIимил фаркь авач. Москвада мажибар еке я. Вучиз?

Абдулашим  Гьажимурадов,

муьгъверганви