Зегьметда зирекбур

Малум тирвал, 26-28-июлдин йи­­къара Дагъустандин дагълух район­риз,­ гьакI СтIал Сулейманан район­дизни марфари, гужлу селлери еке зиянар гана. ВацIар алахьуникди рекьер, муькъвер тухвана, хъвадай цин ва экверин линийриз зиянар хьана.

Чирагъ вацIа са шумуд сеферда яд артух хьуникди Кьасумхуьрел хъвадай яд къвезвай турбаяр селди тухвана. Нетижада райцентрадин агьалияр са шумуд юкъуз хъвадай яд авачиз амукьна. ТIебиатдин татугай гьалари гайи зиянар арадай акъудун патал гзаф организацийри, кьилдин ксари намуслудаказ зегьмет чIугуна. И карда тафаватлу хьайибурук райондин регьберди ва хуьрерин администрацийри гьевес кутуна, абурун зегьметдиз, лугьудайвал, къимет гана. Чирагъ вацIуз селлер атуникди хьайи зиянар арадай акъудуник еке пай кутунай СтIал Сулейманан райондин кьил Саид Темирханова “Касумкент-ЖКХ” карханадин рабочий Эрзиман Метхановаз Чухсагъулдин чар ва пулдин пишкеш гана (шикилда).

Малум хьайивал, идалай­ са шумуд йикъан вилик тIеби­атдин татугай гьалари гайи зиянар арадай акъудуник пай кутунай Кьасумхуьруьн советдин АCП-дин кьил Далгат Бабаевани Эрзиман Метхановаз пулдин пишкеш гана, чухсагъул малумарна.

Чи халкьдихъ зегьметдихъ галаз алакъалу миса­лар­ гзаф ава: «зегьметди ин­сандал афе­рин гъида»­, «кIва­лахзавай кас масадахъ­ муьгьтеж жедач», «зегьмет чIугваз алакь­завай кас бахтлуди я»… Чавай инанмишвилелди лугьуз жеда хьи, Э. Метхановазни вичин бахт зегьметда­ жагъана. Ада «Кьасумхуьр — ЖКХ» — идарада кIва­лахиз 17 йис я. Ада вичин хиве авай везифаяр намуслудаказ кьилиз акъудзава.

Лагьана кIанда, Эрзиман Метханов­ чIехи ва гьуьрметлу хизандин кьил, ферли 5 веледдин буба я.

Хазран  Кьасумов