И мукьвара интернетда бязи сайтра вил экъуьрайла, заз гзаф таъсирдай ва рикIик къалабулух кутадай шикилар ва видеоклипар акуна: чи бубайрин маканар, лезги дагълара, дерейра чкIанвай ва харапIайриз элкъвенвай хуьрер, маларин нехирар, лапагрин суьруьяр амачир чIурар, ягъвар… РикI тIар хьана, бейнидиз цак акъатна.
Заз чир хьайивал, и шикилрин, видеоклиприн автор тележурналист, Кьасумхуьруьн телеканалдин къуллугъчи Мизамудин Магьмудов я. Ада еке зегьмет чIугунва. Тамашачийрин вилик ада чи халкьдин рикI алай ашукь, Дагъустандин шииратдин классик Саид яшамиш хьайи, гьа девиррин амайбурув гекъигайла, лап еке ва саки пуд виш кIвал авай хуьр къе гьи гьалдиз атанватIа къалурзава. Валлагь, шикилар рикI къарсатмишдайбур я. Рагарал, синерал, тепейрал кIвалерин цлар алама. ЧIехи пай харапIаяр я. На лугьуди, хуьруьн винел бомбаяр вегьенва.
Кьурагь районда ихьтин хуьрер мад ава. Агъа Макьар, Вини Макьар, Бурши Макьар, Кумухъар, Цилингар, Тителар, КIимихуьр… Шикилриз килигиз, рикI гьайифди кузва. Яраб абурал чан хкидай вахт хьанвач жал? Журналист Магьмудова вичин шикилралди гьа вахт атанвайдакай хабар гузвай хьтинди я.
Мизамудин Магьмудова гьазуриз, Кьасумхуьруьн телеканалдай гузвай милли тарихдиз, медениятдиз, эдебиятдиз, дидед чIал хуьниз талукь передачаярни пара таъсирдайбур я. И жигьетдай адахъ са шумуд рубрика ава. Тамашачийри и передачаяр пара хушдиз кьабулзава, абуруз мад ва мад килигзава.
Ада тек чи райондин агьалийрихъ галаз ваъ, маса районрин пешекаррихъ, халкьдин арада гьуьрмет къазанмишнавай инсанрихъ, гьакI къариблухра яшамиш жезвай жуванбурухъ галазни гьамиша алакъа хуьзва, абурукай итижлу передачаяр гьазурзава ва халкьдиз раиж ийизва.
Ватандин чилел хтайбур хушвилелди кьабулзава, КТВ-дин тавханада илифарзава. «Жуванбур — гьар сана», «Куьредин тавханада» рубрикайрик кваз передачаяр тешкилзава.
Ам халис журналист, вичин кеспидин чIехи устад я лагьайтIа, чун са кIусни ягъалмиш жедач. Ада кьил кутазвай ва тамамарзавай крар тарихда амукьдайбур жезва. Абурукай садни лезги халкьдин манийрин «Пейкер баха» конкурс я. Гьикьван рикIиз хуш жедайди хьанай ам. Гьар са касдин руьгь хкажна, вирида хушвилелди кьабулна. Халкьдин арада машгьур тахьай бажарагъар дуьздал акъатна, абуру эхирдал кьван хушдиз иштиракни авуна, чпиз талукь чкаярни кьуна.
Яратмишзавайбурухъ галаз гуьруьшар,“Илгьамдин булахдин чешмедал” кIватIал давамарун патал, гъил яргъи авуна, гузвай куьмекар виле акьадайбур жезва. Адан куьмекдалди кIватIалдиз цIийи инсанар, бажарагъ авай жегьилар къвезва, кIвач вилик вегьез, кхьинрин къайдайрин гъавурда гьатзава.
Мукьварал чапдай акъатай Сейфудин Шагьпазован “Иви яд туш” ктабни М. Магьмудован редакторвилик кваз акъатна. Ам дуствал хуьз чидай, къени крарик кьил кутадай кас я.
Бажарагъ авай ксар жагъуриз, абуруз рехъ ачухариз, ктабар акъудиз куьмекар гуз, чапдай акъатай ктабар библиотекайриз ва образованидин идарайрив вичи агакьарзава. Ам медениятдин «Куьредин ярар» центрадин векилни я.
Устад гьикаятчи, драматург Магьмудов Абдулбаридин хизанда 1960-йисан 19-ноябрдиз дидедиз хьайи Мизамудин, ЦIийи Макьарин хуьре хьиз, вири райондани гьуьрмет авай кас, чешнелу хизандин кьил, пуд веледдин буба ва хтулрин чIехи бубани я.
Къуй вичихъ генани еке агалкьунар, чандин сагъламвал, лезги руьгь хкаждай передачаяр гьазурунин карда къуватар артух хьурай.
Ихьтин кьегьал рухваяр авай ватандиз хтайла, чакни лувар акатзава, мукьвал-мукьвал хкведай гьевес жезва.
Гуьлжагьан Мисриханова
