Сифтегьан классрин муаллимвал. КьетIен, жавабдар пеше. Ам кьиле тухун патал зегьметдал рикI хьун чарасуз я. Сир туш, гьар са муаллимди вичин уьмуьрдин чIехи пай акьалтзавай несилдиз бахшзава. Абур аялриз чирвал гуз, абуруз пис-хъсанди чириз алахъ­зава.

Къе чун вичикай рахазвай Кьасумхуьруьн 1-нумрадин юкьван школадин муаллим Шагьбанова Ханзара Гьажибубаевна гьа ихьтинбурукай сад я. Х. Шагьбанова 1963-йисуз Кьурагь райондин КIирийрин хуьре Ватандин ЧIехи дяведин иштиракчи Гьажибуба ва яргъал йисара гамарин фабрикада кIвалахай Пери Ибрагьимоврин хизанда дидедиз хьана. И хизанда 7 аялди — 3 рушани 4 гадади — диде-бубадивай хъсан тербия къачуна.

— За муаллимвилин пеше хкягъун дуьшуьшдин кар туш. Ам заз гъвечIизмаз хуш хьанай, — лугьузва Х.Шагьбановади. — И карда заз зи чIехи стха чешне тир. Амма сифтегьан классрин муаллимвилин пешедал зун ашукьарайди зи сифте муаллим рагьметлу Физилат Велиевна я. Муаллим хьунал зун кьадарсуз шад я. И пешеди заз руьгьдин таъминвал гузва.

ГъвечIи чIавалай муаллим хьуниз майилвалзавай руш 1979-йисуз Дербент шегьердин В.Ленинан тIварунихъ галай педучилищедик экечIна. 1983-йисуз сифтегьан классрин муаллимрин отделение лап хъсан къиметар аваз акьалтIарна. Гьа йисан сентябрдилай­ жегьил пешекарди вичин зегьметдин рехъ хайи хуьруьн юкьван школада башламишна.

1989-йисуз кьисметди Ханзара Гьажибубаевна Кьасумхуьрел акъудна. Ина вичин уьмуьрдин юлдаш Зейдулагь Шагьбановахъ галаз кIвал-югъ кутуна, хизан тешкилна.

1992-йисуз ам Кьасумхуьруьн 1-нум­радин юкьван школада кIвалахал тайинарна. Гьа чIавалай инихъ Х. Шагьбановади ина сифтегьан классрин муаллим яз кIвалахзава. Алай йисуз ам 4-классдин руководитель я.

Аквазвайвал, Ханзара Гьажибубаевнади акьалтзавай несилдиз чирвилер ва тербия гуз 40 йисалай виниз я. Ада тарс гана, школа акьалтIарай гзаф гадайрикайни рушарикай къе муаллимар, духтурар, юристар, экономикадин, техникадин ва маса рекьерай пешекарар хьанва. Гзафбуру къени чпин сифтегьан муаллимдихъ галаз алакъаяр хуьзва.

Х.Шагьбановади гьисабзавайвал, муаллим, иллаки сифтегьан классрин муаллим, анжах предметар гузвай пешекар хьун дуьз туш. Ам аялдин арадал къвезвай мумкинвилерни алакьунар хуьзвайди ва абур мягькемариз куьмекзавайди хьун лазим я.

Идалайни гъейри, Ханзара муаллимди гъвечIи школьникриз эдебдин, гражданвилин, ватанпересвилин тербия гуниз еке фикир гузва. И рекьяй ада диде-бубайрихъ галаз санал аялар патал утренникар, ахтармишунар ва классдилай къецяй мярекатар тухузва.

Сифтегьан классрин муаллим ятIани, Х.Шагьбановади дидед чIал чирун, хуьн ва вилик тухун патални гзаф кIвалахзава. Ада аялрихъ галаз лезги чIал гегьеншарунин рекьяй жуьреба-жуьре мярекатар тешкилзава, кIвалахдин юлдашрин арада чIал хуьнин месэлайрай хсуси тежриба раижзава.

Тежрибалу муаллимдиз школадин коллективдин, кIелзавайбурун ва абурун диде-бубайрин патай еке гьуьрмет ава.

— Ханзара Гьажибубаевна тежриба авай, аялрал рикI алай, кIвалахдив яратмишунардай тегьерда эгечIзавай пешекар я, — лугьузва школадин завуч Нинехалум Шихбабаевади. — Ам тарса­ра цIийи къайдаяр ишлемишзавай, вахтунихъ галаз кам-камуна аваз физвай муаллим я. Гъакъикъатдани, и тегьерда эцигнавай кIвалах себеб яз, ада сифтегьан классра тарсар гайи аялри, чIехи классриз акъатайлани, хъсан къиметар аваз кIелун давамарзава, абурукай районда ва республикада школьникрин олимпиадайра кIвенкIвечияр, шабагьрин сагьибар жезва.

Х. Шагьбановади датIана вичел кIва­лахзава, ам вичин чирвилер артуха­рунал машгъул я. Кьилин категориядин муаллим тир ада Россиядин тежрибалу пешекарри тухузвай семинарра ва вебинарра иштиракзава.

Яргъал йисарин намуслу ва бегьерлу зегьметдай Ханзара Гьажибубаевна Дагъустан Республикадин образованидинни илимдин министерстводин, райондин образованидин управленидин ва школадин дирекциядин патай ганвай гьуьрметдин грамотайрин, чухсагъулдин чарарин, къиметлу пишкешрин сагьиб я. 2023-йисуз ам «РД-дин образованидин отличник» тIварцIиз лайихлу хьана.

— Классда авай аялриз жувакай кьвед лагьай диде, гьуьрмет авай кас хьун шадвалдай кар я. Школа зи уьмуьр­, зи кьвед лагьай кIвал, зун, виликди ялиз, «чIехи ийизвай» зи кьисмет я, — лугьузва Ханзара Гьажибубаевнади­.

Адахъ чандин мягькем сагъвал, хизанда бахтлувал, зегьметда мадни агалкьунар хьун чи мурад я.

Асият  Мирзалиева