ЦIийи ктаб
Алатай гьафтеда Махачкъалада 500 экземплярдин тираж аваз Россиядин журналистрин Союздин Дагъустанда авай отделенидин ревизиядин комиссиядин председатель, «Лезги газетдин» амадагрикай сад ва вичин бине Агъа СтIалрин хуьряй тир Мурад Мегьамедкеримован «Сулейман-Стальский район: по следам истории» тIвар алай тарихдин ктаб чапдай акъатнава.
Къейд ийин хьи, СтIал Сулейманан райондин 95 йисан юбилейдиз талукьарнавай и ктаб Мурад Мегьамедкеримова вичин хсуси пулдин такьатрихъ акъуднава. Гьакъикъатдани, хайи райондин юбилейдин вилик ихьтин ктаб гъилиз атун вири районэгьлияр патал вижевай савкьат хьана.
Ктабда СтIал Сулейманан райондин карта, вири хуьрерин тарихдиз талукь куьруь макъалаяр (районда алай вахтунда чан алай 40 хуьр ава, абурукай 7 цIийиз арадал атанвайбур я, гадарнавай хуьрерин кьадар 23-дав агакьнава), хуьрерин икьван чIавалди мад санани чап тахьанвай цIийи шикилар ва хуьрера 1886-йисуз кьиле тухвай переписдин (хизанриз талукь сиягьрин) делилар гьатнава.
1886-йисан надир документар Мурад Мегьамедкеримова Дагъустандин гьукуматдин кьилин архивдай къачунва ва, са дегишвални кутун тавуна, авайвал ктабда чапнава. Ктабда виликдай Кьасумхуьруьн райондик квай, амма гуьгъуьнлай Мегьарамдхуьруьн райондик акат хъувур 6 хуьруьн хизанриз талукь сиягьарни ганва. Гьа икI, ктабда, санлай къачурла, 69 хуьруьн хизанрин сиягьар ганва. Абурун куьмекдалди и хуьрерин агьалийривай чпин чIехи бубайрин тIварар, абурун эменнидиз талукь делилар жагъуриз ва тухумрин тарар (родовые древа) арадал гъиз жеда.
«Сулейман-Стальский район: по следам истории» ктаб «Лезги газетдин» редакциядай маса гузва. Къимет 2000 манат я.
Агьмед Магьмудов
