31-октябрдин-1-ноябрдин йикъара республикада Каспийдин рекъемрин форум II сеферда кьиле фида. Каспийск шегьердин «Москва» центрадин мулкунал жедай и форумдиз Россиядин жуьреба-жуьре регионрай, гьакIни Каспий гьуьлуьн къерехда авай кьуд уьлкведай — Азербайжандай, Ирандай, Къазахстандай ва Туьркменистандай — 500-дав агакьна мугьманар атун гуьзлемишзава. Форумдин тешкилатчияр Россиядин рекъемрин, гьакIни къецепатан крарин рекьяй министерствояр, Дагъустандин Гьукумат ва «Рекъемрин форумар» ООО («Рекъемрин экономика» АНО-дин куьмекдалди) я. Мярекатдиз гьазурвал аквазвай тегьердикай ва форумдал веревирддай месэлайрикай и йикъара республикадин СМИ-рин векилрихъ галаз «Дагъустан» РИА-дин мулкунал хьайи гуьруьшдал РД-дин рекъемрин рекьяй виликди финин министр Юрий Гьамзатова суьгьбетна.
«Форум Россиядин ва Каспий гьуьлуьн патав гвай уьлквейрин арада кIвалахдин рекьяй алакъаяр хуьнин майдан я. Чна ина рекъемламишунин карда гьалтзавай кар алай месэлаяр веревирд авун патал государстводин идара ийидай органрин, карчивилин векилар, гьар жуьре рекьерай пешекарар ва алимар тупламишун пландик кутунва», — лагьана Ю. Гьамзатова, гуьруьш ачухуналди. Адан гафаралди, форумдал веревирд авун патал теклифнавай месэлайрик ква: арада мензил аваз объектдикай делилар кIватIунин, экологиядин, транспортдин хилера рекъемрин технологияр кардик кутун, гьакIни Каспийдин региондин вад уьлкведин сергьятра аваз рекъемрин технологияр ишлемишунин гележег авай хилер. Форумдин асул макьсадрик гьакIни Каспийдин региондин уьлквейри сада масадан электронный рекъемрин къулар ва документар кьубулунин карда са фикирдал атун акатзава.
Форумдиз талукь яз министрди хабар гайивал, карчи программадилай гъейри, форумдин сергьятра аваз Россиядин дронрин федерациядин регионда авай отделенидихъ галаз санал тешкилнавай дронрин чемпионат кьиле фида.
Форумда вини дережадин са жерге мугьманри иштиракун гуьзлемишзава: РФ-дин рекъемрин рекьяй виликди финин, алакъадин ва массовый коммуникацийрин министр Максут Шадаева, РФ-дин Гьукуматдин Председателдин заместитель Александр Новака, гьакIни Россияда Къазахстандин, Туьркменистандин, Азербайжандин ва Ирандин посолри, и уьлквейра рекъемрин технологийрал элячIунай хиве жавабдарвал авай идарайрин векилри ва икI мад.
Жасмина Саидова
