2024-йисан 9 вацран вахтунда Дагъустан Республикади къецепатан уьлквейрихъ галаз экономикадин рекьяй кьиле тухванвай кIвалахдин нетижайрикай рахун патал «Дагъустан» РИА-дин мулкунал РД-дин Гьукуматдин Председателдин заместитель ва РД-дин Кьилин жемиятдин патай меслятчи Ризван Гъазимегьамедов ва Дагъустандин экспортдиз куьмек гунин центрадин директор Руслан Абаскъулиев СМИ-рин векилрихъ галаз гуьруьш хьана.
Малум хьайивал, республикади къецепатан уьлквейрихъ галаз ийизвай алишвериш, алатай йисан и девирдив гекъигайла, 5 процентдин артух хьанва. Гьа са вахтунда республикади къецепатан уьлквейриз маса гузвай шейэрин кьадар — 8 процентдин, маса уьлквейрай гъизвай шейэрин кьадар 3 процентдин гзаф хьанва. Дагъустандай тухузвай асул суьрсетдик акатзава: шуьше, чан алай гьайванар, якIун суьрсет, техил ва дуьгуь.
Идалайни гъейри, санлай къачурла, тIегъуьндин ва санкцийрин сергьятвилер хьанатIани, Дагъустандай тухузвай шейэрин кьадар эхиримжи кьуд йисан вахтунда хейлин виниз фенва — США-дин 56 миллион доллардилай 162 миллион доллардив агакьдалди.
«Россиядиз санкцийрин сергьятвилери ва маса себебри басрух гузвай вахтунда чун транспортдин «Кеферпад-Кьиблепад» коридордин ва Каспийдин патав гвай уьлквейрихъ галаз алишверишдин мумкинвилер ачух ва абурун игьтияж садлагьана гзаф хьайи гьалда гьатна. Гьелбетда, Дагъустанди вичихъ авай артуханвилерикай менфят къачуз башламишна. Гьа жергедай яз — транспортдин логистикадикай, эхиримжи 5-6 йисан вахтунда виликди тухванвай АПК-дин комплексдикай, чи къуншийрихъ — Азербайжан, Туьркия, Иран — галаз алишверишдин алакъаяр хьуникай ва икI мад. Тухузвай кIвалахдин кьвед лагьай пай яз, чна арабрин уьлквейрихъ галаз экономикадин рекьяй алакъаяр гегьеншарзава, гьакI — Индиядихъ галазни. Вири и себебрин нетижа яз Дагъустанда къецепатан уьлквейрихъ галаз алишверишдин рекьяй тухузвай кIвалах йисалай-суз гегьенш жезва», — лагьана вице-премьерди.
Руслан Абаскъулиева международный базарриз экъечIзавай гъвечIи ва юкьван карчивилин карханайриз ва компанийриз гьихьтин куьмек гузватIа, гьадакай суьгьбетна.
«Центрадин асул макьсад чи республикадин ва регионда акъудзавай метягьдин машгьурвал артухарун я. Бизнесдал машгъул тир гьар са касдиз чизва: гьатта виридалайни ерилу ва хъсан шейни реклама, инсанрин арада машгьурвал авачиз, маса гуз жедач. Чавай виридалайни ширин вирт, виридалайни дадлу як гьасилиз жеда, амма, эгер базарда абурукай хабар авачтIа, маса гуз хьун мумкин туш. Гьаниз килигна, чи асул макьсад къецепатан уьлквейра республикадин суьрсет жезмай кьван гегьеншдаказ реклама авун я. И кар патал бизнес-миссияр тешкилзава, Дагъустандиз къецепатан уьлквейрай мугьманриз эвер гузва, международный выставкайра иштиракзава, карчийриз чпи акъудзавай метягьдиз талукь сертификатар къачуз куьмекзава», — лагьана ада. Р. Абаскъулиеван гафаралди, алай вахтунда Дагъустанда электронный алишверишдин базар йигиндаказ вилик физва.
Жасмина Саидова
