Мегьарамдхуьруьн «Солнышко» тIвар алай аялрин бахча республикадин «Дагъустандин виридалайни хъсан аялрин бахча -2018» конкурсдин «ДОО-дин лап хъсан территория» номинацияда гъалиб хьана. И гьакъиндай «Лезги газетдиз» Мегьарамдхуьруьн райондин администрациядин пресс-къуллугъди хабар гузва.
Конкурс РД-дин образованидинни илимдин министерстводи алай йисан апрелдилай июлдалди, республикадин сергьятра образованидин ери хкажунин, образованидин идарайрин алай аямдин тежриба раижунин макьсаддалди тухвана.
Конкурс кьве паюникай ибарат тир. Республикадин дережадин кьвед лагьай паюна вири санлай образованидин 30 идаради иштиракна. Нетижада алай девирдихъ галаз кьазвайвал кlвалах тешкилзавай, гуьрчегдаказ безетмишнавай Мегьарамдхуьруьн райондин бахча тафаватлу хьана.
«Лезги газет»
