Украинада кьиле физвай дяведин махсус серенжемдин иштиракчи Исмаил Мегьамедован кьегьалвилерикай чна виликдай газетдин чинрилай хабар ганай. Старший лейтенантди Ватан хуьнин карда къалурзавай викIегьвилериз Дагъустандин кьилевайбуруни фикир тагана тунач: 12-октябрдиз Сергей Меликова СВО-дин иштиракчидив «Дагъустан Республикадин вилик лайихлувилерай» орден вахкана.
«Кьегьалвилер къалурзавайбурун алакьунар, агалкьунар къейд авун хъсан кар я. Захъ чи Ватандин сергьятар, сенгерар хуьзвай халис ватанпересриз вири дагъустанвийрин тIварцIихъай сагърай лугьудай мумкинвал хьунал зун шад я. Къе шабагь вичин тухумдин, Дагъларин уьлкведин кьегьал хцив вахканва.
Исмаила сифте — военный училищеда, гуьгъуьнлай гвардиядин танкарин Кантемировский 4 лагьай дивизиядин полкуна къачунвай чирвилер алай вахтунда адаз женгерин майданра герек жезва. Офицер «Дирибашвиляй» медалдиз, «Жуьрэтлувиляй» ордендиз лайихлу хьуни ада вичел ихтибарнавай везифаяр намуслувилелди кьилиз акъудзавайдан гьакъиндай шагьидвалзава», — лагьана С.Меликова.
И.Мегьамедовахъ галаз кьиле фейи гуьруьшдал Сергей Меликова адавай къуллугъ гьикI кьиле физватIа хабар кьуна ва Дагъустанди идалай кьулухъни СВО-да иштиракзавай дагъустанвийриз вири рекьерай куьмекар гудайди къейдна. Старший лейтенантди вичин кьегьалвилериз вини дережада аваз къимет, СВО-дин иштиракчийриз датIана куьмекар гунай республикадин Кьилиз сагърай лагьана.
И.Мегьамедован кьегьалвилерикай сифте яз 2 йис идалай вилик хабар хьанай. Чи ватанэгьлиди танкарин взводдиз регьбервал гузвай. Адан подразделениди миллетбазрихъ галаз женг тухузвай. Садлагьана Россиядин кьушунриз минометдай гуьлле гуз гатIунна. И женгина Исмаилал залан хер хьанвай. ЯтIани ада женг давамарна. Гуьгъуьнлай ам авай БТР минадал хъиткьинна. Адан къеневайбурал залан хирер хьана, гена садни телеф хьанач.
Мукьвара старший лейтенант Мегьамедован взводди миллетбазрин са десте чуьнуьх хьанвай чка тайинарна ва ам тергна. Нетижада адалай стратегиядин жигьетдай еке метлеб авай пункт кьаз алакьна. И кардай чи ватанэгьлидиз и йикъара «Дирибашвиляй» медаль кьвед лагьай сеферда гудайвал я.
Исмаил Низамиевич Мегьамедов 1997-йисуз Дербент шегьерда дидедиз хьана. Адан диде-бубадин хайи хуьрер Мегьарамдхуьрни Кьасумхуьр я. Мегьамедоврин хизан Москвада яшамиш жезва.
Чи мухбир
