Дагъустандин жуьреба-жуьре пипIера чIехи шаир СтIал Сулейманан 155 йисан юбилейдиз талукьарнавай мярекатар давам жезва. Ихьтинбурукай сад 14-октябрдиз Дагъустандин гьукуматдин медуниверситетдани кьиле фена.
Студентриз «XX асирдин Гомеран» уьмуьрдин ва яратмишунрин рекьикай суьгьбетар авун патал алимар, шаирар, журналистар атанвай. Абурун арада филологиядин илимрин доктор, Дагъустандин халкьдин шаир Фейзудин Нагъиев, Дагъустандин писателрин союздин председатель Марина Агьмедова, «Лезги газетдин» кьилин редактор Мегьамед Ибрагьимов, Дагъустандин халкьдин шаирар тир Аминат Абдулманаповани Шейит-Ханум Алишева, яхулрин шаир Супьян Омаров, табасаранрин шаир Сувайнат Куьребегова ва масабур авай.
Лезги шииратдин межлис СтIал Сулейманан яратмишунрикай куьрелди суьгьбет авуналди Фейзудин Нагъиева ачухна ва кьилени тухвана. Гуьгъуьнлай ДГМУ-дин проректор, жегьил алим, чи ватанэгьли Ренат Къурбанисмаилова мугьманар тебрикна, университетдин уьмуьрда Дагъустандин эдебиятдин классикриз, Дагъларин уьлкведин халкьарин адетриз талукьарнавай мярекатар мукьвал-мукьвал тешкилзавайдакай хабар гана.
Межлисдин сергьятра аваз рахай шаирри СтIал Сулейманан уьмуьрдихъ галаз алакъалу итижлу делилрикай ахъайна, адан эсеррин кьетIенвилер къейдна, чпин хайи чIаларал кхьенвай, шаирдиз бахшнавай шиирар кIелна.
Чи мухбир
