12-октябрдиз республикадин меркезда лишанлу ва метлеблу вакъиа кьиле фена: СтIал Сулейманан тIварцIихъ галай парк цIийи хъувурдалай кьулухъ шад гьалара ачухна. Зулун и гуьрчег юкъуз чIехи шаирдин паркуна (адан сурни ина ава) вирибур патал халисан сувар арадал атанвай. Мярекатда РД-дин Кьил Сергей Меликова, мергьяматлувилин «Иман» фондунин регьбер Фируза Керимовади, вице-премьерри, министрри, Махачкъала шегьердин кьили ва хейлин масабуру иштиракна.
Дагъустандин халкьдин шаирдин — «ХХ асирдин Гомеран» тIварцIихъ галай парк арадал гъунин ва адан мулкар алай аямдиз кутугай жуьреда цIийи хъувунин къарар кьабулайди Сергей Меликов я. Паркуни аваррин ва къумукьрин театррин арада авай пуд сквер сад авуна.
Парк цIийи хъувун патал такьатар чара авурди Дагъустандин патай сенатор, чи машгьур ватанэгьли Сулейман Керимов я. Ам ачухуниз талукь митинг гатIундалди вилик С.Меликов ва мугьманар цIийи хъувунвай чкайриз, медениятдизни спортдиз талукь серенжемар тешкилнавай кьилдин майданриз килигна.
Кьилди къачуртIа, паркунин мулкара ихьтин кIвалахар тамамарнава: тротуардин плитка, эквер цIийи хъувунва, цIийи жигъирар ва куьсрияр туькIуьрнава, тарар, кул-кусар цанва, къерехда авай суьрегьияр тамамвилелди гуьрчегбуралди дегишарнава, чиликай фена пляждал элячIдай чкадал цIийи муьгъ пайда хьанва, фонтан цIийи хъувунва. Ял ядайбур, сейрдиз экъечIдайбур патал парк пара гуьрчег, къулай хьанва.
И юкъуз аяларни жегьилар патал спортдинни яратмишунин жуьреба-жуьре акъажунар, выставкаяр кьиле фена: шахматрай турнир, халкьдин сеняткарвилериз талукь выставка, аялрин арада «Зи рикI алай шегьер» шикилрин конкурс, столдин теннисдай акъажунар, Дагъустандин регьбердин патай пишкешар къачудай шахматрин турнир ва масабур. Армрестлингдай кьиле фейи акъажунра Сергей Меликовани иштиракна.
С. Меликова, Ф. Керимовади, вице-премьерри, министрри, вилик-кьилик квайбуру, машгьур шаирри СтIал Сулейманан сурал алай гуьмбетдив цуьквер эцигна. Гуьгъуьнлай гегьенш митинг башламишна.
— Къе фадлай вилив хвейи югъ алукьна: Махачкъаладин гуьрчег пипIерикай сад тир, шегьерэгьлийрин ва мугьманрин ял ядай рикI алай чкадихъ цIийи тIвар, цIийи акунар, цIийи метлеб хьанва, — лагьана Сергей Меликова, мярекат ачухдайла.
Ада къейд авурвал, шегьердин картадал алай и чка гафунин чIехи устаддин тIварцIихъ ягъун адан юбилейдин йисан сергьятра аваз кьиле фин лишанлу кар хьана. «Шаирар гьар жуьрединбур жеда. Садбур кьейидалай кьулухъ абурун чIаларни амукьдач, масабурун яратмишунри лагьайтIа, абур теснифайбуруз эбедивал ва машгьурвал гуда. Эбедивал чи СтIал Сулейманазни хас хьана… Къелем гвачиз кIвалахай СтIал Сулейманалай важиблу ва кар алай фикирар хцидаказ, гуьрчегдаказ малумариз алакьна. АкьалтIай еке зигьинди, камаллувили, зарафатчивили СтIал Сулейманакай вичиз тешпигь авачир хьтин, сагъ девирдин чан алай шикил къалурай шаир авуна», — къейдна Дагъустандин Кьили.
СтIал Сулейман вичин вахтунда гзаф бедбахтвилер акур инсан я. Советрин девирдин шаир Н.Тихонова адакай ихьтин фикир лагьанай: «И инсандиз ам кIудун мумкин тир крар акьван акуна хьи, амма адалай вичин уьмуьрдин вири бедбахтвилерал гъалибвал къачуз алакьна».
Шаирдикай-камалэгьлидикай рахадайла, С.Меликова алава хъувурвал, адан эсеррин метлеб чи йикъарани важиблу я, гуя абур къенин, чун шагьидар тир девирда теснифнава. Адан яратмишунри чак ватанпересвилин, Ватан рикIивай кIанарунин гьиссер кутазва.
Сергей Меликова парк цIийикIа туьхкIуьрунай ва мергьяматлувилин маса хейлин крар кьилиз акъудунай сенатор Сулейман Керимоваз сагърай лагьана.
— Чи ватанэгьли, чIехи классикдин тIварун стха Сулейман Абусаидович Керимова чи аямда гьам республикадин, гьам федеральный дережайра шаирдин тIварцIи мадни кIевиз ван авун патал гзаф крар авуна. И иер парк лагьайтIа, вири махачкъалавийриз ва иниз къвезвай мугьманриз савкьат я. Зи фикирдалди, Дагъустандин и кьве лайихлу хва гьейран жедай тегьерда сад-садаз ухшар я. Абуруз кьведазни, гьар садаз вичин девирда, ватанэгьлийрин ва хайи чилин месэлайрив рикIин сидкьидай эгечIун хас я.
Сулейман Керимова вири крар рикIин михьивилелди ийизва. Адан регьимлу крарик СВО-дин иштиракчийрин хизанриз, пак чкайриз зияратдиз физ кIанзавайбуруз гузвай куьмекар, Дербентда террористри чукIурай чувудрин ва хашпарайрин ибадатханаяр гуьнгуьна хтун, террориствилин гьужум алудунин карда телеф хьайи полицейскийрин хизанрин тереф хуьн, начагъ аялар патал азарханаяр эцигун, Дербентда фонтан арадал гъун ва Дагъустандиз еримлу жедай мумкинвал гузвай хейлин маса проектар акатзава, — лагьана Дагъустандин регьберди.
Машгьур ватанэгьлидин регьимлувиликайни агъайнавиликай рахадайла, Сергей Меликова кьетIендаказ къейдна: «Адан патай чимивал, регьимлувал агакьнавай инсанар гьамиша а чимивални регьимлувал багъишай инсандин патав жеда. Герек хьайила, четин декьикьайра Дагъустанди адан (Сулейман Керимован — ред.) тереф гьамиша хуьда».
Меркездин кьил Юсуп Умавова вири шегьерэгьлийриз цIийи хъувунвай парк мубаракна. Меркезвийрин ва вичин патай ада Махачкъаладин сейли ватандаш Сулейман Керимоваз ва «Иман» фондунин регьбер Фируза Керимовадиз парк арадал гъуник пай кутунай сагърай лагьана. Ада мергьяматлувилин гьисабдай шегьерда ихьтин гегьенш проект сифте яз кьилиз акъуднавайди лагьана. Мярекатдин сергьятра аваз, Ю. Умавова Ф. Керимовадив «Махачкъала шегьердин сейли ватандаш» лишан вахкана.
Гуьгъуьнлай паркунин майдандал экверинни музыкадин фонтан кардик кутуна.
Куругъли Къалажухви
