15-октябрдиз Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз кьиле фейи совещанидал малум хьайивал, Дагъустанда сарин (куьлуь карч алай гьайванрин йис) промышленностдин кластердин сергьятра аваз чпин умуми къимет 343,6 миллион манат тир инвестицийрин 4 проект кьилиз акъудиз эгечIнава.
РД-дин Гьукуматдин пресс-къуллугъдин делилралди, инвестпроектар кьилиз акъудунин нетижада кIвалахдай алава 147 чка пайда жеда. Алай вахтунда сар гьялдай кластердик муьжуьд кархана акатнава.
Инвесторри чуьхвенвай сар гьялуниз, сун гъаларикай хранвай ва трикотаждин затIарин производстводиз пулдин такьатар чара ийидайвал я.
Инвесторрилай гъейри, Дагъларин уьлкведа сун кластер вилик финиз региондин дережада аваз кьабулнавай куьмекдин серенжемрини таъсирзава. Кьилди къачуртIа, карханайривай сар ва гьайванрин лияр гьялун патал маса къачунвай алатриз акъатнавай харжийрин са пай гьукуматдивай вахчуз жезва. Алай йисуз и макьсадриз республикадин бюджетдай 100 миллиондив агакьна пулдин такьатар чара авунва.
Къейд ийин хьи, сар гьялунал гьалтайла, Дагъустан Россиядин регионрин арада 1-чкадал ала. Гьар йисуз республикада лапагрилай 14,5 агъзур тонндив агакьна сар твазва.
Агьмед Магьмудов
