ЦIийи ктабар
ДаркIуш-Къазмайрилай тир шаир, мухбир, биологиядин муаллим Эйзудин Сайдумован тIвар кIелзавайбуруз фадлай хъсандиз таниш я. Мукьвара «ЦIийи Кавказ» издательстводи ва «Куьредин ярар» медениятдин центради адан цIийи ктаб — «Илгьамдин нямет» чапдай акъудна.
Ктаб 148 чиникай ибарат я. Ада вишелай виниз шиирар ва «НуькI хала», «Кьил вахце!», «ЦIал кьуьлер» къаравилияр гьатнава.
Авторди вичин шиирар «Жуван диде-бубадиз, Ватандиз, дидедин чIалаз вафалу жен!», «Арифдарар, шаирар чи даяхар я», «Гьуьрметзава квез жемятди», «Уьмуьрдин легьзеяр», «Гуьзел я чи тIебиат», «Муьгьуьббатди кузва хьи зун», «Етим Эмин, бахшзава ваз чIалар за», «Набататар-дарманар», «Автордиз бахшнавай шиирар» разделриз пайнава.
Ктаб «Дидедиз» шиирдилай башламиш жезва.
Эйзудин Сайдумова са шумуд шиирда дидедин чIал хуьниз эвер гузва. «Дидедин чIал, хуьх лезгияр эбеди, КьепIин мани ягъа гьар са дидеди…» кхьизва шаирди.
Ктабда Низами Генжевидиз, Ярагъ Мегьамедаз, Етим Эминаз, Алкьвадар Гьасан Эфендидиз, Ялцугъ Эминаз, СтIал Саядаз, Седакъет Керимовадиз, Къазанфарбег Зулфикъароваз ва маса чIалан зурба устадриз бахшнавай шииррини еке чка кьунва.
За винидихъ лагьанай: Эйзудин Сайдумов биолог я, ада тамам 36 йисуз Эминхуьруьн ва ДаркIуш-Къазмайрин школайра биологиядин муаллим яз кIвалахна. Ада «Набататар-дарманар» разделда ганвай «Набататриз», «Вергер», «ЧичIекар», «Мертер», «Тамун некьияр», «Инияр», «Буран», «Пурнияр», «Газарар», «Хъархъун тар», «ЖикIияр», «ЦIантарар», «Серкер»», «ВакIан кIирияр», «Гъулцин тар», «Чумалар» шиирарни кIелиз хуш къведайбур хьанва. ГьикI лагьайтIа, шаирди-биологди гьа няметрикай инсандин сагъламвилиз авай хийирдикай суьгьбетзава.
Зун инанмиш я хьи, Э. Сайдумова вилик йисара акъудай «Асирдин гуьзгуь», «Кьуьчхуьр Саид», «Етим Эмин» ва «Муьгьуьббатдин есир» ктабар хьиз, «Илгьамдин нямет» ктабни кIелзавайбуру хушвилелди кьабулда.
ЦIийи ктаб акъатун мубарак авуналди, чаз чи къелемдин стха Эйзудин Сайдумовахъ мягькем сагъламвал, яратмишунрин рекье мадни еке агалкьунар хьана кIанзава.
Хазран Кьасумов
