Са шумуд югъ идалай вилик Кеферпатан Осетия-Алания республикадин меркез Владикавказда азаддаказ кьуршахар кьунай стхаяр Хадарцеврин призар патал международный турнир кьиле фена. Ана машгьур чи ватанэгьлийрини чпин устадвал къалурна. ИкI, 65 кг-дал къведалди заланвал авайбурун арада Шамил Мамедова — 1 ва Рамазан Ферзалиева 3-чкаяр кьуна.
Ярумчух финалда Ш. Мамедоваз чкадин спортсмен Э. Валиев 7:1 гьисабдалди кумукьна. Р. Ферзалиеванни М. Фадзаеван (амни Кеферпатан Осетия-Аланиядай тир) бягьс 7:7 гьисабдалди акьалтIна. Чи ватанэгьлиди буьруьнждин медаль патал бягьс кьиле тухудайвал хьана. Ам ада устадвилелди кьилиз акъудна, Къиргъизистандай тир Улугбег Жолдошбегов Рамазан Ферзалиеваз 11:0 гьисабдалди кумукьна.
Шамил Мамедова Рамазан Ферзалиев ярумчух финалдин эхиримжи легьзейра кумукьай осетинвидилай «кьисас вахчуна», Шамил Мамедоваз Марат Фадзаев 10:0 гьисабдалди кумукьна.
____________________
И йикъара Великие Луки шегьерда 21 йисал къведалди яшара авай жегьилрин арада СЗФО-дин (Кефердинни РагъакIидай патан федеральный округ) кIвенкIвечивал патал дзюдодай акъажунар кьиле фена. Ана Вологдадин, Архангельскдин, Ленинграддин, Мурманскдин, Калининграддин ва Псковдин областрай, Карелия ва Коми республикайрай тир 80-дав агакьна викIегь спортсменри иштиракна. Абурун арадай яз, вичин ери-бине Кьурагь райондин Бахцугъай тир, алай вахтунда Санкт-Петербургда яшамиш жезвай Рамин Сябетов 100-кг-дал къведалди заланвал авайбурун арада 1-чкадиз лайихлу хьана.
Тренерар тир С. Гьуьсейнован, В. Токареван, А. Ивченкодин гъилик вердишвилер къачузвай чи ватанэгьлиди ноябрдиз Рязань шегьерда кьиле фидай уьлкведин кIвенкIвечивал патал акъажунра вичин устадвал къалурда.
РикIел хкин: саки са варз вилик Ленинграддин областдин 21 йисал къведалди яшара авай жегьилрин арада дзюдодай акъажунра Р. Сябетова 2-чка кьунай.
____________________
Алатай гьафтеда Кьурагьрин 1-нумрадин СОШ-да, Муаллимрин йикъаз талукьарна, волейболдай акъажунар кьиле фена. Идакай райадминистрациядин пресс-къуллугъди хабар гана.
Акъажунрин тешкилатчияр школадин дирекция ва райадминистрациядин физический культурадин, спортдин ва жегьилрин крарин рекьяй отдел тир. Абур ачухуниз талукьарнавай шад мярекатда райондин образованидин отделдин ИМЦ-дин начальник Исамудин Агьмедова, Кьурагьрин 1-нумрадин СОШ-дин директор Гьамид Мисриева, администрациядин физический культурадин, спортдин ва жегьилрин крарин рекьяй отделдин начальник Рамиз Рамазанова иштиракна. Абуру райондин муаллимриз пешекарвилин сувар тебрикна.
ИкI, къизгъиндаказ кьиле фейи къугъунрин нетижада Кьурагьрин 1-нумрадин СОШ-дин муаллимрин хкянавай команда — 1, «Кьурагьрин хуьруьн совет» — 2 ва ЕДДС командаяр 3-чкайриз лайихлу хьана. Абуруз медалар, грамотаяр ва спортдин пишкешар гана.
Рагнеда Рамалданова
