7-октябрдиз Махачкъалада Россиядин налогрин федеральный къуллугъдин образованидин проектдин «Мастер государственного администрирования» лишандик кваз 4-модулдин кIвалах гатIунна. Ана иштиракун патал жуьреба-жуьре регионрай Дагъустандиз 100-лай виниз налоговикар атана.
Сергей Меликован тIварцIихъай мярекатдин иштиракчияр РД-дин Гьукуматдин Председателдин заместитель Нариман Абдулмуталибова тебрикна.
«Метлеблу ихьтин мярекат кьиле тухун патал Дагъустан хкягъунал чун шад я. Къе ина уьлкведин саки вири регионрин векилар кIватI хьанва. И карди чаз амадагвилин алакъаяр мягькемардай, кIвалахдин жигьетдай цIийи терефар чирдай, сада-садаз куьмекдай мумкинвилер гузва. Чи республика эхиримжи йисара вири рекьерай вилик физва. Гьавиляй налогрин рекьяй кIвалах къайдадик кутуни яшайишдин рекьяй чIехи метлеб авай проектар пулдин такьатралди таъминарунин, инфраструктура вилик тухунин месэлайризни таъсирда», — лагьана Н.Абдулмуталибова.
Къейд ийин хьи, модуль 11-октябрдалди давам жеда. И йикъара жуьреба-жуьре тренингар, мастер-классар тешкилда, налогрин къурулушдин месэлайрин гъавурда хъсандиз авай пешекарри кIвалах вилик тухунин рекьяй менфятлу меслятар къалурда.
Чи мухбир
