Меркездин «Парамакс» кинотеатрда «Пассажирар» фильмдин презентация кьиле фена. Ам Дагъустандин Кьил Сергей Меликован куьмекдалди, РД-да терроризмдин идеологиядихъ галаз женг чIугунин Комплексный программадин сергьятра аваз, Дагъустандин культурадин министерстводин заказдалди «Каспий-фильм» студияди гьазурна. Адан режиссёр ва автор 2022-йисуз бедбахтвилин дуьшуьшдикди кечмиш хьайи Камиль Алиев я. Фильмдин тIварцIяй кьатIуз жезвайвал, террористри пассажирар — дагъдин хуьре ачухнавай реабилитациядин центрадиз физвай начагъ инсанар ва абурухъ галай духтурар — авай автобус кьунва. Фильм 17-октябрдиз прокатдиз акъатда.
Презентацияда Дагъустандин Халкьдин Собранидин депутатри, региондин министерствойринни ведомствойрин, СМИ-рин векилри, общественный деятелри, К. Алиеван багърийри, ярар-дустари иштиракна. КIватI хьанвайбуруз С. Меликован тIварунихъай адан советник Шамиль Алиева республикадин культурадин уьмуьрда лишанлу вакъиа тебрикна. Кинодихъ инсандин къанажагъдиз, тербияламишуниз таъсирдай къуват авайди къейд авунихъ галаз сад хьиз, алай аямда иллаки жегьилриз терроризмдихъ миллет авачирди, терроризм анжах писвал тирди къалурунал — фильмдин кьилин макьсаддал — фикир желбна.
Дагъустандин культурадин министр Зарема Бутаевади съёмкайрал чи кинокомпания машгъул хьунилай вичин шадвал къалурна, Сергей Меликоваз, съёмкаяр кьиле фейи муниципалитетрин регьберриз, «Ястреб-Каспий» СОБР-диз, актерриз, са гафуналди, фильм арадал гъун патал куьмекар гайи вирибуруз сагърай лагьана.
— Къенин юкъуз Дагъларин уьлкведиз кинодин индустриядин векилрини екез итижзава. Бажарагълу жегьилар — режиссерар, актерар — пайда хьуни чи руьгь хкажзава. Ахьтинбурукай сад тир Камиль Алиев. Камилан фикир кинодин куьмекдалди терроризмдин идеологиядихъ галаз женг чIугун тир, — къейдна министрди.
З. Бутаевади фильм арадал гъайи ксарив чухсагъулдин чарар вахкана. Абурун арада «Каспий-фильм» кинокомпаниядин генеральный директор Мегьамед Гитиномегьамедов, генеральный продюсер Мария Турчина ва масабур ава.
Фильм арадал гъайибурун тIварарихъ чими келимаяр Камилан буба Мегьамедсултан Алиевани лагьана.
Рагнеда Рамалданова
