Украинада кьиле физвай вакъиайриз, махсус серенжемдин нетижайриз, гъалибвал къазанмишун патал Россиядин Яракьлу Къуватри кьабулзавай серенжемриз гьар са ватанэгьлиди итижзава. Виридаз, дяведин гьалар акьалтIна, чи аскерар­, гуьгьуьллубур, хизанрин патав хта­на ислягь зегьметдив эхгечIна кIан­зава. И югъ мукьвал авун патал агъзурралди чи кьегьалри Украинадин миллетбазрихъ, цIийи фашист­рихъ галаз къизгъин женгер кьиле тухузва, Донбассдин, Курскдин областдин хуьрер, мулкар азадзава. И женгина гуьгьуьллувилелди РФ-дин оборонадин министерстводихъ галаз­ икьрар кутIуннавай Пиркъа­йибов Пиркъайибани дири­башвал, жуьрэтлувал къалурзава. 2021-йисалай икьрардин бинедаллаз Астрахандин тади гьалда тапшуругъар тамамардай кьилдин батальонда къул­лугъзавай Пиркъайибова дяведин махсус серенжемда гьа сифте йикъалай иштиракзава.

Ери-бине Докъузпара райондин­ Миг­рагърин хуьряй тир Пиркъайиб­ 1998-йисан 20-сентябрдиз Дербент шегьерда дидедиз хьана. ГъвечIи чIа­валай ам спортдал машгъул тир. Шегьерда кьуршахар кьадайбурун, кикбоксингдин секцийра вердишвилер къачуна, региондин, республикадин ва СКФО-дин дережадин турнирра, чемпионатра иштиракна. Гъалибвилерни къазанмишна. Спортдин кьве жуьредай тайин разрядризни лайихлу хьана.

Дербентдин 9-нумрадин юкьван школа акьалтIарай жаван шегьердин экономикадин ва праводин колледж­дик экечIна. Анаг акьалтIарна, Дагъус­тандин госуниверситетда кIелунар давамарна.

Пиркъайиб масадан дердиникай ха­бар кьадай, кIеве авайдаз куьмек гуз алахъдай инсанрикай я. Хъсандиз кIе­лиз, вич чешнелудаказ тухуз вердиш ­гадади колледждин ва университетдин  общественный уьмуьрдани гьевесдивди иштиракна. КIелзавайбуру Пиркъайиб во­лонтеррин дестедин башчивиле хкяна. Гуьгьуьллу жегьилри, шегьерда цIаяр хкадардайла, субботникар тухудайла, ветеранриз куьмек гудайла, жегьилрин мярекатар тешкилдайла, спортдин акъажунра еке активвал къалурна. Ихьтин гьерекатар такуна амукьнач. Пиркъайибаз МЧС-дин, РД-дин жегьилрин крарин рекьяй министерстводин, Дербент шегьердин администрациядин, пуд диндиз талукь музейдин ва вичи кIелай ­колледждин патай гайи грамотаяр ава. Адаз «2015-йисан лап хъсан студент» тIвар гана.

Дербент шегьерда акъатзавай «Ватан» газетдин корреспондент Нава Нисуевадихъ галаз хьайи суьгьбетда Пиркъайибова вич махсус серенжемда хьуникай, миллетбазрин истисмарвиликай, Донбассдин агьалияр азад авуникай, гьукуматдин сиясатдикай икI лагьана:

«За армияда къуллугъзавай. Четин­­ вахтунда, чапхунчийрин ниятар­ чIуру­бур тирла, Ватан хуьн гьар садан пак буржи я. Чи гьукуматди, армия кье­тIен тапшуругъар кьилиз акъудиз ра­къу­рунихъ галаз сад хьиз, гьар са ас­кердин, адан хизандин гьакъиндайни­ къайгъу чIугвазва. Исятда оборонадин­ минис­терстводихъ галаз икьрар ку­тIун­завай­бурув са сеферда гузвай са миллион манат агакьзава. Къуллугъдин вахтунда вацра 200 агъзур манатдилай виниз мажиб къачузва. Идалайни гъейри, чав ва чи хизанрив яша­йиш­дин рекьяй маса кьезилвилер, галайвилер агакьзава. Са рахунни алач, ихьтин къайгъударвили чаз алава­ къуватар гузва. Чна командиррин тап­­шуругъар уставди, къуллугъди ва намусди истемишзавайвал тамамар­зава».

Пиркъайиба миллетбазар рагъ­акIи­дай патахъ чукурзавай женгера иштиракдайла, суса адаз бала багъишна. Гила аскер Ватан хуьзвай кьегьал буба я. Бубадин буржи вичин баладин кьилел михьи цав, рагъ хьун, хизанди­ бахтлувал гьиссун патал, акьалтзавай четинвилериз таб гана, душмандиз фир-тефир чка сал авун я. И карни адалай алакьзава.

Пиркъайиб Пиркъайибов вичелай­ чешне къачуз жедай кас я. «Пиркъа­йиб ­вичи хкянавай кардиз вафалу, гьар са месэладив жавабдарвилелди эгечI­завай, четин уламра викIегьвал, ди­рибашвал къалурдай алакьунар авай жегьил я. Женгер кьиле физвай майданра ада са шумуд сеферда вичин юлдашар къутармишна, четинвилерай­ акъуд­на. Гьа и саягъда миллетбазрикай азад авур хуьрера амай инсанризни куьмекна. Ихьтин ерийралди Пир­къа­йибова командиррин, юлдашрин па­тай гьуьрмет къазанмишнава.

Отпускдиз хтана, хизандал кьил чIу­­­гуна хъфенвай аскерди — «Дя­ве­дин­ махсус серенжемдин иштиракчи», «Женгина тафаватлувиляй» ме­далрин иесиди, женгерин гьерекатрин ветеранди — баркаллу кар давамарзава, ­Ватандин итижар уьтквемвилелди хуьзва.

Нариман  Ибрагьимов