7-октябрдиз Дагъустандин Кьил Сергей Меликова 2025-йисан федеральный бюджетдин проектдиз талукьарна, Федерациядин Советдин Председатель Валентина Матвиенкодин регьбервилик кваз кьиле фейи совещанида иштиракна.
В.Матвиенкоди къейд авурвал, вилик йисара хьиз, цIини, бюджет тешкилдайла, хизанриз яшайишдин рекьяй куьмекар гунин месэла кьилинбурукай сад яз ама. Идалайни гъейри, цIийи духтурханаяр, мектебар, аялрин бахчаяр, яшайишдин маса объектар эцигунизни кьетIен фикир гуда, гьикI лагьайтIа, уьлкведин гзаф кьадар регионра демографиядин рекъемар йисалай-суз хкаж жезва.
Бюджетдиз талукь асул доклад РФ-дин финансрин министр Антон Силуанова авуна. Ада къейд авурвал, гьам къведай, гьамни 2026-2027-йисарин бюджетра вилик финин рекьяй уьлкведин Президент Владимир Путина тайинарнавай милли макьсадар кьилиз акъудун ва милли проектар патал герек тир вири шартIар тешкилун сад лагьай чкадал эцигнава. Мисал яз, милли проектар кьилиз акъудуниз чара ийизвай такьатар, вилик йисарив гекъигайла, 2 сеферда артухарда. 2025-йисан январдилай кIвалахзавай ва кIвалах тийизвай пенсионеррин пенсийриз талукь яз индексация кьиле фида. Дидевилин капиталдин кьадардиз талукь язни дегишвилер кьиле фида. «Защитники Отечества» фондуниз 40 млрд манатдив агакьна такьатар чара ийида. 2030-йисалди уьлкведин регионра 100-дав агакьна аялрин цIийи бахчаяр эцигда. Са гафуналди, вилик квай йисарин бюджетрин умуми кьадар, виликанбурув гекъигайла, са шумуд сеферда артух жеда.
Лагьана кIанда, федеральный бюджетда къейднавай яшайишдин вири хилер Дагъустан патал важиблубур я. Алай вахтунда республикадин гьукуматди пулдин такьатрихъ галаз алакъалу кьилин документдин винел кIвалахзава. Къведай йисар патал региондин бюджетдани яшайишдин рекьяй чIехи метлеб авай проектриз кьилин фикир гуда.
Агьмед Магьмудов
