Туьнтбур силисдик акатна
Полициядин къуллугъчийри Тарумовский райондин гьукумдин векилриз талукь яз къуват ишлемишай дуьшуьшда иштиракунай шак физвайбур тайинарна ва кьуна. Идакай МВД-дин пресс-къуллугъди хабар гана.
24-сентябрдиз «Астрахань-Махачкъала» шегьре рекьел къуллугъ кьилиз акъудзавай Госавтоинспекциядин къуллугъчийриз «ВАЗ-210930» машин гьалзавайда къайдаяр чIурзавайди акуна. Ада улакьар гвай масабур патални хаталувал арадал гъизвай. Машин акъвазарун истемишайла, гьалзавайда яб ганач, ада улакьдин йигинвал мадни артухарна. Табелдин яракь ишлемишнатIани, къайдаяр чIурайдалай Тарумовский районда чуьнуьх жез алакьна. Гуьгъуьнлай ДПС-дин къуллугъчийри агьвалатдихъ галаз алакъалу пуд кас тайинарна. ЧIуру ният авайбуру чеб туьнтдаказ тухузвай. Абуру къайдаяр хуьзвай органрин векилрин беденриз хасаратвилер авуна. Агьвалат кьиле фейи чкадал атай уголовный розыскдин оперативникри гьужумайбур кьуна ва полициядин отделдиз хкана. И делилдай суд-дуван авун патал материал кIватIнава.
«Лезги газет»
