И йикъара Москвада вили чIуларин сагьибрин арада грэпплингдай кьиле фейи Россиядин чемпионатда уьлкведин жуьреба-жуьре регионрай тир спортсменрихъ галаз иштиракай, вичин ери-бине Докъузпара райондин Мискискарин хуьряй тир Саид Залова 80 кг-дал къведалди заланвал авайбурун арада къизилдин медаль къазанмишна. Гила ада декабрдиз кьиле фидай дуьньядин чемпионатдиз гьазурвал аквада.
РикIел хкин: С. Залован им сад лагьай агалкьун туш. Вичин 10 йис тамам хьайидалай кьулухъ спортдал рикIивай машгъул жезвай кьегьалдихъ спортдин са шумуд жуьредай къазанмишнавай агалкьунар гзаф ава. Кьилди къачуртIа, ам женгинин самбодай Дагъустандин, СКФО-дин, Россиядин чемпион, панкратиондайни Россиядин чемпион я. Грэпплингдайни ада Дагъустандин, Россиядин чемпионвилин, дуьньядин чемпионатдин призёрвилин тIварар къазанмишна. Ам ММА-дай Дагъустандин, Ульяновскдин областдин, Поволжьедин федеральный округдин чемпион, гьакIни женгинин самбодай ва панкратиондай спортдин мастер я.
С. Залова Абдулманап Нурмегьамедован школада тренер Руслан Ражабован гъилик вичин устадвал хкажзава. Ада ДГУ-дин яшайишдин факультетда кIелзава.
Рагнеда Рамалданова
