1-октябрдиз РД-дин Кьил Сергей Меликован регьбервилик кваз кьиле фейи совещанидал республикадин образованидин хилез талукь месэлайрикай рахана.
С. Меликова къейд авурвал, мектебра асул фикир акьалтзавай несилриз ватанперевилин тербия гуниз, абуруз экстремизмдинни терроризмдин идеологиядин гьакъикъи ният гьихьтинди ятIа чируниз гана кIанда. Амма бязи мектебра, кьиле тухвай ахтармишунри къалурайвал, и жигьетдай кIвалах зайиф гьалда ава. С. Меликова вичин меслятчийрал ноябрдалди республикадин муниципалитетра РД-дин АТК-дин тапшуругъар гьикI кьилиз акъудзаватIа чирун тапшурмишна.
Гуьгъуьнлай мектебарни аялрин бахчаяр недай-хъвадай суьрсетдалди таъминарунин месэлайрикай рахадайла, региондин Кьили и кар чешнелудаказ тешкилнавай муниципалитетар къейдна.
«Ахцегь райондин кьилиз аферин! Районда авай мектебра аялриз чкадин ичер, Дагъустанда гьасилзавай суьрсет гузва. Дербент, Хасавюрт районрани и жигьетдай кIвалах хъсанзава. Каспийск шегьерда лагьайтIа, аялриз мектебра, бахчайра гузвай тIуьнрин еридал неинки са образованидин управлениди, гьакI диде-бубайрини гуьзчивалзава. Виринра гьа икI хьун ва и месэла кьетIен гуьзчивилик кутун герек я…», — лагьана С.Меликова.
Агьмед Магьмудов
