Пул ва къизилар чуьнуьхунай…
Буйнакскдин агьалидал вичин гражданский папан пул ва къизилдин безекар чуьнуьхунай шак физва.
Шегьердин полициядин дежурный частуниз 61 йисан яшда авай дишегьли арза гваз атана. Ада гражданский итимди вичин 245 агъзур манат пул ва 415 агъзур манатдин къимет авай къизилдин затIар чуьнуьхнавайдакай ихтилатна.
33 йисан яшда авай шак физвайди полициядин отделдиз хканва. Малум хьайивал, юлдаш ксанвайла, шак физвайда сейф ахъайна ва ана авай пул ва безекар вахчуна, ам Махачкъаладиз хъфена. Дишегьлидин зенгериз ада жаваб хганач.
Полициядин къуллугъчийри тайинарайвал, чIуру ният авайда чуьнуьхай пул вичиз кIандайвал серфна, безекар малумар тавунвай касдиз маса гана. Тахсиркарвилерин лишанриз килигна, РФ-дин УК-дин 158-статьядай уголовный дело къарагъарнава. Силис давам жезва.
Иесидив вахкана
Алай йисан 17-сентябрдиз ППСП-дин къуллугъчийри ва Махачкъаладин Ленинан райондин оперативникри машин чуьнуьхунай ва наркотикар хуьнай шак физвай агьали кьуна.
Шак физвайди 27 йисан яшда авай Гергебил райондин агьали я. Ада ихтилатайвал, полициядин къуллугъчияр акурла, ам вичин машиндин патав фена. Адаз полициядин къуллугъчияр вичин патав атанвайди хьиз хьанвай. Машинда лагьайтIа, ада наркотикар чуьнуьхнавай. КичIе хьана, ам катиз башламишна, мукьвал мензилда адаз мотор кIвалахдик кутунвай ичIи «ВАЗ-2106» машин акуна. Гьална машин ва «геле къекъуьникай» катна. Гуьгъуьнлай ада чуьнуьхай машин гадарна.
Вич и жуьреда тухвайдан амалрал полициядин къуллугъчийри фикир желбна. Абуру жегьил тайинарна ва адавай элкъвена хтун истемишна. Адан «Мерседесдай» 28,88 грамм мефедрон жагъана. И делилдихъ галаз алакъалу яз уголовный дело къарагъарнава.
«Лезги газет»
