22-сентябрдиз Москвада Бразилиядин джиу-джитсудай чIулав чIуларин сагьибрин арада ACBJJ версиядай дуьньядин ачух чемпионат акьалтIна. Са шумуд юкъуз давам хьайи кесерлу и акъажунра, Россиядин хьиз, Тажикистандин, Узбекистандин, Таиланддин, Финляндиядин, Эрменистандин ва Къиргъизистандин 1000-далай виниз спортсменри чпин устадвал къалурна. Чи машгьур ватанэгьли, вичин ери-бине СтIал Сулейманан райондин Эминхуьряй тир Далгат Османова нубатдин сеферда гъалибвал къазанмишна.

РикIел хкин: вичин 12 йис тамам ­хьайидалай инихъ спортдал рикIивай машгъул жезвай кьегьалдихъ спортдин­ рекье къазанмишнавай агалкьунар гзаф ава. Абурук Бразилиядин джиу-джит­су­дай вили рангунин чIуларин сагьибрин арада ва грэпплингдай са шумудра къазанмишнавай дуьньядин, Россиядин ва Дагъустандин чемпионвилин (5 сеферда, 2015-2019-йисара) тIварарни акатзава. Ам Европадин Кубокдин сагьибни я.

23 йисан яшда авай Далгата ДГМУ-дин лечфак агалкьунралди акьалтIарнава. Гележегда адаз хирург жедай ният ава.

***

Алатай гьафтедин ял ядай йикъара Белоруссиядин меркез Минскда, Олимпиададин 3 сеферда чемпион Александр Медведаз (ам алай йисан 2-сентябрдиз 87 йисан яшда аваз рагьметдиз фена) гьуьрмет авунин лишан яз, гьар йисуз тешкилзавай международный турнирда (цIи ам 53-сеферда кьиле тухвана) вичин ери-бине Ахцегьай тир ва алай вахтунда Азербайжандин патай экъечIзавай Жабраил Гьажиева 74 кг-дин заланвал авайбурун арада къизилдин медаль къазанмишна.

Финалдиз акъатдалди Ж. Гьажиева   4 бягьс кьиле тухвана. Кьилди къачуртIа,  ярумчух финалда адаз дагъустанви Ра­ма­зан Мурадов — 12:5 ва финалдани Ге­оргий­ Дзоциев (Россия) 10:1 гьисабралди кумукьна.

РикIел хкин: Жабраил Гьажиев 21 йисал къведалди яшара авайбурун ­арада ­дуьньядин ва  Европадин чемпион ва кесерлу гзаф маса турниррин гъалибчи я.

***

Минскда азаддаказ кьуршахар кьунай жаванрин арада кьиле фейи международный «Медвежонок» турнирда дагъустанви 7 спортсменди кIвенкIвечи чкаяр кьуна. Чи ватанэгьли, Махачкъалада яшамиш жезвай Махач Абдуллаев 55-кг-дин заланвал авайбурун арада  гимишдин медалдиз лайихлу хьана.

Рагнеда  Рамалданова