Дагъустанда Кеферпатан Кавказдин жегьилрин образованидин «Кас­пий — 2024» форумди вичин кIвалах гатIуннава. Ам ачухуниз талукьарнавай мярекатда РД-дин Гьукуматдин Председатель Абдулмуслим Абдулмуслимова иштиракна.

И форум гьар йисуз тешкилзава. ЦIи ана Россиядин 50 региондайни къецепатан са жерге уьлквейрай (Египетдай, Туьркиядай, Узбекистандай, Белоруссиядай, Къиргъизистандай…) 500-дав агакьна жегьилри иштиракзава.

Форумдин сергьятра аваз грантрин конкурсни кьиле тухуда ва виридалайни хъсан проектриз пулдин куьмек гуда. Гьар са грантдин кьадар 1 миллион манатдив агакьзава.

«Жегьилрин «Каспий» форум квез куь алакьунар къалурдай ва цIийи чирвилер къачудай майдан я. ЦIи форумда ватанпересвилин тербиядин месэлайриз кьетIен фикир гуда. Зун алай вахтунда уьлкведа арадал­ атанвай гьаларивай са жегьилни къерех тежедайдахъ агъунва…», — лагьана премьер-министрди, жегьилрихъ элкъвена.

Мумкинвилер яратмишзава

Дагъустанда жегьилрин форумар тешкилиз са шумуд йис я. 23-сентябр­диз Избербаш шегьерда 11-сеферда­ Кеферпатан Кавказдин жегьилрин­ чирвилерин международный «Кас­пий — 2024» форум кIвалахдив эгечI­на. Ам 28-сентябрдалди давам жеда­. Яшайишдинни чирвилерин фо­рум­дин макьсад Россиядин Федерациядин регионрин ва Кас­пий гьуьлуьн къерехрив гвай государствойрин же­гьилрин кьурулуш­рин башчийрин­ конкурентвилин мумкинвилер арту­харун, садаз-садан тежрибадикай менфят къачудай шар­тIар тешкилун­, халкьдин майи­шатдин бязи хилер ви­лик тухудай теклифар гун ва жегьилрихъ галаз­ кIвалах тухунин цIийи жуьреяр-къай­даяр туькIуьрун, жагъурун я. Нубатдин мярекатдин кьилин тема жегьилрин туризм вилик тухуниз талукьарда.

РД-дин жегьилрин крарин рекьяй министр Камил Саидова малумарайвал, форумда иштиракун патал 4500 касди арзаяр кхьенвай. Абурукай мярекатда Каспий гьуьлуьн патарив гвай государствойрин ва РФ-дин 30-дав агакьна регионрин жегьилрин къурулушрин лап активный, инициативный, эксперт­ривай чирвилер къачунвай ва цIийи, метлеблу крарал машгъул жез ашкъи авай 500-лай виниз  векилри иштиракзава. Гъиле кьазвай крар кьилиз акъудуниз талукь грантрин конкурсни кьиле тухуда. Гьалиб хьайибурув са миллион манат агакьда.  Мярекатдин кьилин везифани жегьилрин къурулушриз садаз-садан тежрибадикай менфят къачудай международный майдан арадал гъун я.

Мярекатдин иштиракчияр, темайрал (туризмдин, карчивилин, ватанпересвилин тербия гунин, рекъемрин алемдин ва «Сифтегьанбурун гьерекат» гьерекатдин) гьалтайла, вад патал пайна. 24-сентябрдин нянин сятдин кьудаз форум шад гьалара ачухна. 27-сентябрдиз пленарный сессияда Дагъустан Республикадин Кьил Сергей Меликова, РФ-дин жегьилрин крарин рекьяй агентстводин регьбердин везифаяр вахтуналди тамамарзавай Денис Аширова иштиракда.

Мярекат пара итижлуди жеда. Иштиракчийри мастер-классра чпин алакьунар, проектар къалурда, лекцийра безнесдин, туризмдин, медиадин, ватанпересвилин тербия гунин, жаванрин гьерекатдин рекьяй экспертрин теклифрихъ, меслятрихъ, веревирдерихъ яб акалда. Виридаз хсуси проектар туькIуьрдай, грантар къачудай ва проектар уьмуьрдиз кечирмишдай мумкинвал яратмишда. Гьелбетда, жегьилриз цIийи танишар жагъида, санал кIвалахунин жигьетдай меслятарда.

Къейд авун лазим я хьи, «Кас­пий — 2024» мярекатдин сергьятра аваз иштиракчияр Каспий гьуьлуьн къваларив гвай уьлквейра ва РФ-дин регионра жегьилрихъ галаз кIвалах тухунин рекьяй кIватIнавай тежрибадихъ галаз таниш хьана. А тежрибадин бинедаллаз жегьилрихъ галаз алакъаяр тайинардай ва кIвалахдай цIийи къайдаяр, кIалубар туькIуьрунин гьакъиндай веревирдер авуна.

Нариман  Ибрагьимов