Малум тирвал, гъилевай йисуз ХХ асирдин зурба шаир­рикай сад тир СтIал Сулейман ­дидедиз хьайидалай инихъ 155 йис тамам хьана. Дагъус­тан Рес­­публикадин Кьил Сергей Ме­ликова 2024-йис СтIал Сулейманан йис яз малумарна.

ЧIехи шаирдин ватанда, рес­публикада, гьатта вири уьл­кведа шииратдин межлисар, гьар жуьре маса мярекатар, конкурсар кьиле фин давам жезва. Абурун мурад-метлеб сад я: Дагъустандин Советрин девирдин литературадин бине кутур, несилриз дерин фикир-фагьумдин яратмишунар тур камалэгьли шаир рикIел хкун, адан къамат эбеди авун, девлетлу ирс несилрив агакьурун.

21-сентябрдиз Дондал алай Ростов шегьерда Дагъустандин халкьдин шаир СтIал Сулейма­нан гьуьрметдай адан тIварцIихъ галай куьчеда авай 16-нумрадин кIвалерин цлал мемориалдин кьул алкIурна. Шаирдин 155 йисан юбилейдиз талукь тир шадвилин мярекат тешкилайди Рос­тов шегьерда кардик квай лезгийрин милли тешкилат я. И карда абуруз Дагъус­тандин халкьарин медениятдин центради­ куьмек гана. Ана шегьердин­ администрациядин къуллугъчий­ри, яратмишунардай­ интеллиген­ция­­­дин, лезгийрин чкадин милли тешкилатрин векилри ва милли музыкадин дестейри ишти­ракна. Шаирдин таъсирлу эсерри­ шегьерда лезги ва урус чIа­ларалди ван авуна. Ихьтин лайихлу кардик кьил кутур чи ватан­эгьлияр сагърай!

Трибунадихъай шаир рикIел хкунин, адан уьмуьрдинни яратмишунрин рекьикай метлеблу ихтилатар шегьердин Первомайскдин райондин админист­рациядин кьилин везифаяр тамамарзавай Иван Павленкоди, Дагъустандин халкьарин КДЦ-дин правленидин председателдин заместитель Тегран Пегьливана, Дагъустандин землячестводин агъсакъал Афиз Абдурагьманова, теклифнавай­ мугьманри ва Первомайскдин райондин агьалийри авуна. ЧIехи шаирдин мярекатда Ахцегь рай­ондин суддин 42-учас­токдин мировой судья Дуьгуьш Дуьгуьшевани иштиракна.

— Салам алейкум, гьуьрметлу ростоввияр! Дуьз 30 йис вилик за и шегьерда институтдин юридический факультет акьал­тIарна. Ярар-дустар ама, абурухъ галаз алакъаяр хуьзва, — лагьана Д. Дуьгуьшева. —  Къе, дустунин мехъерик кваз, шегьер­да СтIал Сулейманан мярекат авайдакай хабар хьайила, иштирак тавуна акъвазиз хьанач. Дагъус­тан, лезги халкь вири дуьньядиз машгьур авур чи чIехи шаир рикIел хуьзвай куьн сагърай!

Дашдемир  Шерифалиев