Квез чидани?
. Гвинея-Бисау РагъакIидай патан Африкадин гъвечIи (умуми майдан — 36125 кв. километр) уьлкве я. Меркез — Бисау.
. Бисау анин виридалайни чIехи шегьер я. Уьлкведин вири агьалийрин 30 процент и шегьерда яшамиш жезва.
. Гвинея-Бисауда 2 миллионни 139 агъзурдалай виниз инсанар яшамиш жезва.
. 1973-йисалди Гвинея-Бисау Португалиядин колония тир.
. И уьлкведа португал чIал кьилинди я.
. Африкадин бязи маса уьлквеяр хьиз, Гвинея-Бисауни кесиббурук акатзава.
. Гвинея-Бисауда туристар са акьван гзаф жезвач. Себеб ам я хьи, и уьлкведиз физ кIанзавайбуру махсус теклиф къачун герек жезва. Гвинея-Бисаудин сергьят тирвал флюпе тIвар алай тайифа яшамиш жезва. И тайифадин чIехи паяр къадим заманадин яшайишдин шартIара хьиз яшамиш жезва.
. Гвинея-Бисауда гьич са кинотеатрни авач.
. И уьлкведа электростанциярни авач. Электричество соляркадални бензиндал кIвалахзавай генераторрин куьмекдалди арадал гъизва. И делилдихъ галаз алакъалу яз, уьлкведин гзаф агьалияр электричестводикай магьрум я.
. Африкадин муькуь уьлквейрив гекъигайла, Гвинея-Бисауда вацIар гзаф ава.
. И уьлкведин чIехи пай агьалияр савадсузбур я.
. 2012-йисуз Гвинея-Бисауда государстводин сиясатда дегишвилер хьана, нетижада гьукум военнийрин гъиле гьатна. Муьжуьд вацран мажиб ганач лугьуз, армиядин аскерри чпин наразивал ачухдаказ къалурна.
«Лезги газет»
