Пулни ноутбук чуьнуьхна
Алай йисан 9-сентябрдиз полициядин къуллугъчийри тайинарайвал, Хив райондин Кьандикь хуьруьн 16 йисан яшда авай жегьилдал чарадан хсуси кIваляй эменни чуьнуьхунай шак физва. Идакай РД-дин МВД-дин пресс-къуллугъди хабар гузва.
41 йисан яшда авай дишегьлидин кIвализ дакIардай гьахьна, ада анай 50 агъзур манат пул ва 26 агъзур манатдин къимет авай ноутбук чуьнуьхна.
Полицейскийри тайинарна хьи, шак фенвайди идалай вилик кIвалин иеси тир дишегьлидин хцин патав мугьманвилиз атанай. Гьавиляй адаз и кIвале инсанар гьамиша яшамиш тежезвайди чизвай. ИкI, серфе вилив хвена, жегьилди дакIардин шуьше акъудна ва ам кIвализ гьахьна. КIвалин кьвед лагьай мертебада адаз пул авай къаб ва ноутбук акуна.
Чуьнуьхай пул жегьилди вичин хсуси игьтияжар патал серфна. Эменнидин са пай иесидив вахканва.
Къалмакъалдай кьил акъудзава
Полициядин къуллугъчийри тайинарайвал, 5-сентябрдиз йифен вахтунда Къарабудахкент хуьруьн 33 йисан яшда авай агьалиди, ички квай затIар хъвадайла арадал атай наразивилер себеб яз, Аданак хуьруьн 34 йисан яшда авай агьалидин далудиз тIарвал гудай тапанчидай гуьлле гана.
И кардай кьил акъудун патал яракь ишлемишайди полициядин отделдиз хкана. Ада ихтилат авурвал, къейднавай юкъуз ада дустарихъ галаз ял язавай. ТIуьнар-хъунар ийизвай вахтунда абурукай садаз таниш тушир касди зенгна ва, ада къейд авурвал, телефондай рахазвайда нагьакьан гафар лугьузвай. Гуьгъуьнлай абур гуьруьшмиш хьана, амма арадал атанвай чуьруькар рахунралди акьалтIариз хьанач. Къалмакъал гьатай арада сада масад тапанчидай яна.
Тапанчи полициядин къуллугъчийри вахчунва. Агьвалат ахтармишзава.
«Лезги газет»
