30-августдиз Россиядин Федерациядин Игит, старший лейтенант Муслим Муслимоваз Дербент шегьердин администрациядин кьиле авайбуру, шегьердин собранидин депутатри, Афгъанистандин дяведин ветеранри, жемиятдин векилри, Дербентдин школа-интернатдин кадетри чlехи тlвар тебрикна.
Гуьруьшдив гатlундалди шегьердин администрациядин вилик квай майдандал чи кьегьал хва «Гуьнеш» ансамблди зарб кьуьлуьналди къаршиламишна. Кадетрин корпусдин пайдах гвай взвод Россиядин Игитдин гьуьрметдай оркестрдин шад маршдин гьавадикди жергеда аваз къекъвена.
Шегьердин кьил Агьмед Къулиева, М. Муслимоваз чlехи тlвар тебрик авуналди, разивилин, гьуьрметдин келимаяр лагьана. «Чун дагъустанвияр игит халкь тирдахъ нубатдин сеферда инанмиш жезва. Сад лагьай йикъалай махсус серенжемда иштиракзавай чи гадайри, чандилай гъил къачуна, Ватан хуьзва. Абуру халисан итим, халисан дагъустанви хьун вуч лагьай чlал ятlа, женгинин чилел субутзава. Фронтда ихьтин рухваяр хьуналди, чна гъалибвал чи пата жедайдахъ инанмишвалзава»,- лагьана А. Къулиева.
Тебрикдин гафар гьакlни шегьердин собранидин председатель Гь. Мирзоева, ветеранрин советдин председатель Гь. Гьажимурадовани лагьана.
Ахпа А. Къулиева Игитдив «Достояние Дербента» медаль вахкана. Меценатри чпин патай Муслим Муслимовав шегьердин «Центральный» кварталдай пуд кIвалин квартира къачудай сертификат вахкана.
М. Муслимова хуш гуьруьш тешкилай виридаз сагърай лагьана. Мярекатда иштиракзавай кадетрихъ элкъвена М. Муслимова къейдна: «Куьн гуьгьуьллудаказ и рекьиз атанва. Алахъна кlела, кlвалаха, хиве авай везифаяр хъсандиз тамамара. Игит хьун — эбеди яшамиш хьун лагьай чlал я. Гъалибвал чи пата жеда!»
***
28-августдиз Дербент райондин администрациядин актовый залда Россиядин Игит Жавидан хва Муслим Муслимов шад гьалара кьабулна.
Гуьруьшда Дагъустан Республикадин Кьилин куьмекчияр тир Саид Маматханова, Мурад Рамазанова, Замир Гьажимурадова, Россиядин Игит Темирлан Абуталимова, игитдин багърийри, жемиятдинни жегьилрин тешкилатрин векилри ва масабуру иштиракна.
Райондин кьил Мавсум Рагьимова, Дербент райондин вири агьалийри Муслиман кьегьалвилелни игитвилел дамахзавайдакай лагьана. «Ихьтин жегьил яшда гражданвилин гьахълу рехъ кьун чи жегьилриз ватанпересвилин чешне я, — давамарна ада. — Дагъустанвияр, Ватан кlеве гьатайла, гьамиша сад хьиз ам хуьз къарагъайди я. И дяведани чна Гъалибвал къазанмишда. Муслим хьтин игитар гзафбур патал ашкъилувилинни умуддин лишан хьанва. Куь гьар са камуни, гьар са карди чи уьлкведиз ислягьвални секинвал хкизвай югъ мукьва ийизва. За кьилди ваз, гьакIни ватанпересвилин тербия ганвай багърийриз сагърай лугьузва».
Муслима, военный къуллугъдикай суьгьбетдайла, женгинин майдандал вегьезвай гьар са камуна Ватан, багърияр хуьнихъ ялзавайдакай лагьана. Ада къейд авурвал, халисан игит анжах кьегьалвал къалурзавайди туш, жуван багърийрин хьиз, женгинин юлдашрин терефни хуьзвай гьар сад я.
Гуьруьшдин эхирдай райондин кьили М. Муслимовав «Дербент райондин вилик лайихлувилерай» лишан ва агьалийрин патай чилин участокдин документар вахкана. Гуьруьшда иштиракзавай Белиж поселокдин кьил Рамиз Гьабибулаева Россиядин Игитдиз гуьрчег къакъара авай гапур пишкешна.
Къагьриман Ибрагьимов
