Дагъустандин Гьукуматдин Председателдин заместитель Нариман Абдулмуталибова СтIал Сулейманан райондай тир вадралди 11-классда кIелзавай кьве рушаз тIварцIин стипендия тайинарнава. Идакай РД-дин Гьукуматдин пресс-къуллугъди хабар гузва.

Мергьяматлувилин «Хайи мектебдиз савкьат ая» серенжемдин сергьятра аваз арадал гъанвай стипендияр гьар вацра ЦIийи поселокдин юкьван мектебдин ученицайриз — Хатун Загьировадизни Фатима Малабаевадиз гуда.

2-сентябрдиз Нариман Абдулмуталибова­ абурухъ галаз гуьруьш кьиле тухвана ва кIелун­ра абурухъ мадни еке агалкьунар хьун алхишна. Рушари датIана жуьреба-жуьре предметрай районда, республикада тешкилзавай конкурсра, олимпиадайра иштиракзава, кIвенкIвечи чкаяр кьазва.

Нариман Абдулмуталибова гьам СтIал Сулейманан райондин кьил тир йисарани, гьамни гила — вице-премьердин везифаяр тамамардайлани,  алакьунар авай жегьилриз куьмекар гузва, абурун агалкьунар къейдзава. РикIел хкин, са шумуд йис идалай вилик Н. Абдулмуталибован буйругъдалди ДГУ-дани ДГПУ-да филологиядин факультетда хайи чIал чирзавай лезги студент­риз махсус стипендия гузвай. Гила ихьтин стипендияр лезги студентриз ФЛНКА-дини Алкьвадар Гьасанан тIварцIихъ галай центради гузва.

Чи  мухбир