Мергьяматлувилин «Иман» фондуни хайи чIал хуьнин тереф хуьзва

Августдиз 7 ва 8 лагьай классар патал лезги чIалан ва литературадин цIийи ктабар чапдай акъатна. Абур мергьяматлувилин «Иман» фондунин (регьбер — Фируза Назимовна Керимова) такьатрин куьмекдалди Москвада кардик квай «Просвещение» чапханади ва Санкт-Петербургда авай адан филиалди акъуднава.

«Иман» фондуни идалай виликни 6-класс патал хайи чIаланни литературадин цIийи ктабар, гьакIни гуьгъуьнлай 1-6-классар патал вири ктабар мад сеферда акъуд хъувуниз такьатар чара авунай. Нетижада бес тежезвай мектебривни герек ктабар агакьна.

ЦIийи ктабар Дагъустанда лезги чIа­ланни литературадин тарсар гузвай вири мектебрив агакьарнава. 7-8-классрин ктабрин винел зегьмет чIугунвай авторрин дестейрик акатзава: Къ. Акимов, С. Акимова, Н. Абдулмуталибов, К. Ферзалиев, Р. Тажибова, Ш. Мирзоев, Ж. Мейланова, Гь. Мегьамедов, Н. Мегьамедов.

За А.А. Тахо-Годидин тIварцIихъ галай ДНИИП-дин илимдин къуллугъчи Жаклина Мейлановадивай цIийи ктабрикай ихтилат авун тIалабна.

«Эхиримжи йисара хайи чIаланни литературадин ктабар лап кьит хьанвай, гьавиляй мектеб­ра и жигьетдай четин гьалар арадал атанвай. И месэладиз фикир гуналди, чи гьуьрметлу Фируза Назимовнади «Иман» фондунай пулунин такьатар чара авуна. Шазни чна и фондунин куьмекдалди акъудай 6-класс патал ктабар ва 1-класс патал гъилин хатIарин дафтарар мектебриз пайнай. Заз А.А. Тахо-Годидин тIварцIихъ галай педагогикадин илимдинни ахтармишунрин институтдин директор Альбина Сефербеговнадин, вири къуллугъчийрин ва жуван патай Фируза Назимовнадиз чухсагъул лугьуз кIанзава. Къейд ийин­ хьи, ктабар герек тир кьадардилай артухни акъуд­нава», —  лагьана ада.

К. КIелетви