Сифте яз Куьре Меликакай, Тимурленган дявейрин девирдин лезги шаирдикай, малумат гайиди Бакуда яшамиш­ хьайи чи районэгьли Мавлуд Ярагьмедов тир. СтIал Сулейманан районда кардик квай «Куьредин ярар» культурадин цент­ради вичин нубатда Куьре Мелик Курхуьрел дидедиз хьайиди ва адан уьмуьр­дин­ бязи вакъиаяр тайинарна. Дегь девир­дин чи чIехи шаирдиз бахшнавай сифте­­гьан мя­­рекатда «Куьредин ярар»­ куль­тура­дин центрадин председатель А. Агь­медпа­­шаева, адан членар тир ком­по­зи­тор­ М. Аб­дулмуталибовади, шаи­рар и цIа­рарин автор зани А. Ка­ми­лова ва масабуру иштиракнай. Анал Абидин Камилова лагьанай: «Сажи­дин му­аллим, вун чалай яшдиз­ни чIехи я, иллаки­ къавумар яз, Курхуьруьн жемятдизни хъсандиз чизвай кас я. И кардик кьил кутун патал ваз нин патав фидатIа, нихъ галаз меслятар ийидатIа, чалай хъсандиз чида. Тарихдихъ галаз алакъалу и кар чна квел тапшурмишзава. Чалай алакьдайвал, чнани а кардин къайгъу ийида».

Гьа пакадин йикъалай эгечIна, зун са шумуд сеферда Курхуьрел фена, яшлубурухъ галаз ихтилатар авуна, абурун рикIел хкунриз яб гана. Куьре Меликан йикъар кьиле тухун патал за гьа чIаван хуьруьн советдин председатель Султанов Иминуллагьахъ, хуьруьн майишатдин кьил Гьажиев Максимахъ, школайрин муаллимрихъ галаз меслятар авуна. Им фад авуна кIандай кIвалах тирдал вири рази хьана.

За чIугур зегьметдин мярекат гурлувилелди кьилиз акъудуник районда гзафбуру чпин пай кутунай. Абурукай яз, админист­рациядин векилар тир Маил Даудовича ва Альбина Мустафаевади, яшлу комму­нист Гьажимегьамед Алиметова, «Куьредин яра­рин» векилри — писатель Абдулбари Магьмудова, Маина Абдулмуталибо­ва­ди, Абидин Камилова, «Лезги газетдин»­ патай Шагьабудин Шабатова, вичин коллективни галаз райондин культурадин отделдин начальник Ярагьмед Ярагьмедова, райондин телестудиядин къуллугъчийри.

Райондин культурадин уьмуьрда ри­кIел аламукьдай вакъиадиз элкъвей и мярекат 1995-йисан 22-майдиз кьиле фенай. Гьанлай кьулухъ гьар йисуз Курхуьруьн кьве школада Куьре Меликан йи­къар­ тухузва.

Куьре Мелик 1340-1410-йисара яшамиш хьана. Тимурленгахъ галаз ягъунра­ ам куьреэгьли женгчийрин дестейрин кьиле хьайиди чаз якъин малум я. А дяведа душманри Курхуьрни барбатIнай, чпин гъиле гьатай шаирдизни зулумар авунай.

Куьре Меликан (ва я адан тIварцIихъ язавай эсерар) гьанлай кьулухъ газетризни журналриз акъатна, гила абур ктаб­рани гьатнава. Къадим лезги шаир къенин чи уьмуьрдиз хкуник жуван пайни хьунал за дамахзава. Къведай йисуз чна Куьре Меликан 665 йис къейдда. Хъсан тир ам республикадин дережада аваз тухванайтIа.

Сажидин  Саидгьасанов,

Дагъустандин халкьдин шаир