И йикъара чи арадай 85 йисан яшда аваз РД-дин муниципальный къуллугъдин лайихлу работник, зегьметдин ветеран, яргъал йисара СтIал Сулейманан райондин идарайра жавабдар къуллугъар кьиле тухвай, активнидаказ хайи райондин жемиятдин уьмуьрда иштиракай, къени къилихрин, хуьре-кIвале гьуьрмет авай инсан, вафалу уьмуьрдин юлдаш, аялрин, хтулрин рикI алай буба, жегьилрин насигьатчи Максим Мегьамедович Гьажиев акъатна.
М.М. Гьажиев 1940-йисан 8-февралдиз СтIал Сулейманан райондин Курхуьрел дидедиз хьана. Юкьван школа хъсан къиметралди акьалтIарай жегьилди ДГУ-дин физический факультетда кIелна. Зегьметдин рехъ 1961-йисуз Кьурагь райондин Ашарин 8 йисан школада завучвилелай башламишна.
1962-1964-йисара Советрин Армиядин жергейра къуллугъна.
1964-1966-йисара КIварчагърин 8 йисан школада директордин везифаяр кьиле тухвана. Гуьгъуьнлай, 1966-йисуз, ВЛКСМ-дин райкомдин 2-секретарь, 1967-йисуз — ВЛКСМ-дин обкомдин отделдин инструктор, 1967-1974-йисара ВЛКСМ-дин Кьасумхуьруьн райкомдин 1-секретарь яз кIвалахна.
1974-1985-йисара Максим Мегьамедович КПСС-дин СтIал Сулейманан райкомдин тешкиллувилин отделдин заведующийвиле тайинарна.
1985-1989-йисара Максим Гьажиева халкьдин контролдин отделдин председателвиле кIвалахна.
1989-1990-йисара ада КПСС-дин РК-дин 2-секретарвал, 1990- 1991-йисара СтIал Сулейманан райондин халкьдин депутатрин райсоветдин отделдин заведующийвал авуна.
1991-1997-йисара Максим Мегьамедовича «Самурский» совхоздин директорвиле, 1997- 2001-йисара Курхуьруьн администрацияда кьилин пешекар, 2002-2010-йисара Курхуьруьн 1-нумрадин юкьван школада психолог яз кIвалахна.
Максим Мегьамедовича зегьмет чIугур коллективра вич еке чирвилер ва агалкьунар авай пешекар, хъсан тешкилатчи яз къалурна. Ам гьукуматдин са кьадар шабагьрин сагьиб я: ДАССР-дин Верховный Советдин Президиумдин Гьуьрметдин кьве грамота, ВЛКСМ-дин ЦК-дин вад грамота, ВЛКСМ-дин обкомдин вад грамота ва са жерге медалар.
Чна Максим Мегьамедовичан хизандиз, вири мукьва-кьилийриз, дериндай хажалат чIугунивди, башсагълугъвал гузва. Адан экуь къамат чи рикIера амукьда.
С.М. Темирханов, Ш.Гь. Мегьамедханов,
Л.А. Оружев, З.Н. Къагьриманов,
Э.С. Рустамов, А.Б. Фатулаев, Р.А. Абдулазизов,
А.А. Мейланов, А.Б. Асланов, И.М. Ризаев, Р.Р. Гьажалиев.
