22-августдиз Ахцегьа, арабист-алим Гьажи Керемалидин тIварунихъ галай медресада, «Ислам диндин чирвилер ва Къуръан кIелун» темадай 9-16 йисарин яшара авай гадайрин арада конкурс кьиле фена. И мярекат медресадин регьбер Ширинбег гьажи Мирзоева ва ана аялриз диндин тарсар гузвай муаллимар тир Мегьамед Эфендиевани Мегьамед-Вели Гьажиева тешкилнавай.
Конкурсда гьакIни Ахцегьрин жуьмя-мискIиндин имам Абдулашим гьажи Абдулгьашумова, Бабуль-Абваб центрадин векил Насрулла гьажи Абдулова, центрадин муаллим ва гьафиз Мурад гьажи Садикьова ва масабуру иштиракна.
Конкурсда 70-далай виниз гадайри иштиракна. Абуруз виридаз дипломарни грамотаяр, пулдин пишкешарни мектебда герек къведай шейэр гана. Араб чIалан грамматикадай ва Къуръан кIелунай лап хъсан алакьунар къалуруналди 1, 2 ва 3-чкаяр кьур Мамаев Агьмедаз, Эфендиев Шевкетаз, Къанатилов Айнураз, Мамедов Саидаз, Саидов Рашидаз, Желилов Умараз — велосипедар, автосамокат, рангунин телевизор гана.
Мярекат адан иштиракчийризни мугьманриз тIуьн-хъун ва аялриз эдеб-ахлакьдин насигьатар гуналди давам хьана. Чпин тIварар малумариз кIан тахьай чкадин жумарт спонсоррин мергьяматлувилин куьмекдалди кьиле тухвай конкурсдин савкьатрин ва амай харжийрин фондуни санлай 500 агъзур манат тешкилна.
Дашдемир Шерифалиев
