Дагъустанда 14-17 йисарин яшда авай аялар патал карчивилин рекьяй онлайн-олимпиада кьиле физва. Ам республикадин карчивилиз куьмек гунин центради ва «Образованидин центр» ООО-ди санал тешкилнава.
Мярекатдин макьсад мектебра кIелзавай аялриз карчивилин жигьетдай вердишвилер гун, абур финансрин рекьяй савадлу ва бизнес-хиле ахтармишунардай кIвалахдал итижлу авун я.
Къейдзавайвал, 1-июлдилай башламишнавай олимпиада республикадин вири муниципалитетрани шегьерра кьиле физва ва 2024-йисан 7-декабрдалди давам жеда. Ада иштиракун патал «Оlimp-dagestan.ru» сайтда регистрация авун ва карчивилин рекьяй суалриз жаваб гун лазим я. Нетижаяр кьурдалай кьулухъ олимпиададин вири иштиракчийриз сертификатар гуда, гъалибчияр лагьайтIа, къиметлу пишкешралди къейдда.
Амина Муслимова
