Дагъустандин ЦУР-дин (центр управления регионом) пресс-къуллугъди хабар гузвайвал, 5-12 августдиз дагъустанвийрин патай 2709 арза агакьнава. Виликан гьафтедин делилрив гекъигайтIа, и рекъем саки 17 процентдин гзаф хьанва.
Виридалайни пара арзаяр Махачкъаладин агьалийрин патай агакьна — 1898 арза. Ахпа Дербентдин, Каспийскдин, Буйнакскдин ва Дагъустандин Огни шегьеррин агьалийрин патай. Абурай якъин жезвайвал, республикадин агьалийрик къалабулух кутазвай кьилин месэлаяр ЖКХ-дихъ галаз алакъалубур я: вахт-вахтунда зирзибил гадарун, кьакьан гьавайрин кIвалерин гьаятар авадан авун, рекьер къайдадик кутун ва жемиятдин транспортдин уьлчмейрин кьадар артухарун.
Махачкъалада вахт-вахтунда зирзибил гадарун энгел хьунин кьилин себеб, шегьердин мэр Юсуп Умавован фикирдалди, меркездиз къвезвай туристрин кьадар гзаф хьунихъ, зирзибил гадарзавай техника ва абурал кIвалахзавай рабочияр бес тахьунихъ галаз алакъалу я. И месэла гьялун патал техника вахтуналди маса идарайривай къачузва. Гузвай мажибдин кьадар хкажуналди, цIийи рабочияр желбзава. «Алай вахтунда цIийи техника маса къачун патал республикадин бюджетдай алава такьатар чара авунва. Чун шегьер вири патарихъай авадан авун патал алакьдай вири кIвалахар ийиз алахъзава», — лагьана Ю.Умамова.
Махачкъалада иллаки гатун вахтунда зирзибилдин месэла хцибурукай садаз элкъвезва. Бязи дуьшуьшра зирзибил, йикъаралди гадар тийиз, яшайишдин кIвалерин патарив гумукьзава. Гьакъикъатдани, техника бес жезвач. Алатай гьафтеда шегьердин администрациядиз табий тежезвай маса идарайри чара авур техникадин куьмекдалди жуьреба-жуьре куьчеяр зирзибилдин хъуртарикай михьдай мумкинвал хьана. ЦIийи техника маса къачурла, и месэла эхирни гьялиз жедайдак умуд кутунва.
Агьмед Магьмудов
