Чаз кхьизва
Чи хуьрера агьалийрал вахт-вахтунда газетар, журналар, жуьреба-жуьре чарар-кагъазар агакьариз, гьакъисагъвилелди кIвалахзавай почтальонар тIимил авач. Абурукай сад СтIал Сулейманан райондин Уллу-Гъетягърин почтадин алакъадин отделенидин регьбер Фаизат Егъибегова я. Ада и пешедай зегьмет чIугваз 35 йис хьанва.
Ф. Егъибегова Вини Хъартасрин хуьре 1964-йисуз малдар Абдулманафан хизанда дидедиз хьана. Уллу-Гъетягърин мектеб акьалтIарайдалай кьулухъ ада кIелунар Харьков шегьердин алакъадин техникумда давамарна.
Са кьадар вахтунда ада виликан Айдунбегован тIварцIихъ галай совхозда жуьреба-жуьре кIвалахар авуна. 1989-йисуз Ф. Егъибеговадиз Уллу-Гъетягърин почтадин алакъадин отделенидиз регьбервал гун теклифна. Кьисметдини ам и хуьруьз акъудна: адахъ галаз санал кIелай Тагьир Егъибегова Фаизатахъ галаз санал хизан кутуна. Абурун хизанда — пуд рушни 2 гада чIехи хьана. Селмиди, Эльзади, Саидади Дербентда педучилище акьалтIарна. Абур къе чпин хизанарни галаз жуьреба-жуьре шегьерра яшамиш жезва.
Егъибеговрин чIехи гада Саид — офицер, Украинада кьиле физвай дяведин махсус серенжемдин иштиракчи я. Са женгина адал залан хер хьана. Саки 5 вацра жуьрэтлу дагъвиди госпиталда сагъламвал мягькемар хъувуна. Алай вахтунда уьлкведин Яракьлу къуватрин жергейра къуллугъун давамарзава. РФ-дин Президент В. Путинан Указдалди адаз «Жуьрэтлувиляй» медаль ганва.
ГъвечIи гада Агъабегни, чIехи стха хьиз, офицер я. Старший лейтенантдин чинда авай ада Балтикада къуллугъзава.
Ф. Егъибеговади Уллу-Гъетягърин администрациядик акатзавай 6 хуьруьн агьалийрив 35 йисан девирда газетар, журналар ахгакьарзава. И йисара адакай наразивилин келима лагьай садни хьанач.
Хейлин йисара почтадин алакъадин хиле чешнелудаказ кIвалахунай Фаизат Егъибегова РФ-дин рекъемрин рекьяй вилик финин министр Максут Шадаеван, СтIал Сулейманан райондин кьил Саид Темирханован патай шабагьриз лайихлу хьана. Санал кIвалахзавай юлдашрин, хуьрерин жемятрин арада адаз еке гьуьрмет ава.
Къуй 7 хтулдин баде Фаизат Егъибеговадихъ чандин сагъвал, яргъи уьмуьр, агалкьунар, кIвале берекатар хьурай!
Ямудин Бабаев,
зегьметдин ветеран
