Россиядин мектебрин директоррин тербиядин рекьяй 100-далай гзаф меслятчийри, гьа жергедай яз Дагъустандин мектебрин векилрини 14-июлдилай 1-августдалди Самарадин областда кьиле фейи Вирироссиядин жегьилрин «iВолга» форумдин «Тербиядин устадар» сменада иштиракна, хабар гузва РД-дин «Аялвилиз рехъ къалурзавайбур» («Навигаторы детства») ресурсдин центрадин пресс-къуллугъди.
«“iВолга” — им инсанриз, абурун къимет авачир хьтин багьа тежрибадиз талукь мярекат я. Форум кьиле физвай сад лагьай йикъалай за жув гьар жуьредин итижлу фикиррин, теклифрин алемдиз акъатайди хьиз гьиссна. Заз «Тербиядин устадар: аялвилиз рехъ къалурзавайбур» сменадин регьберриз чпин чирвилер ва тежриба чав агакьарай пешекарриз рикIин сидкьидай чухсагъул лугьуз кIанзава. Ана къарагъарай месэлайрин хцивили, важиблувили заз гзаф таъсирна. Абуру зун жуван пешекар рекьикай цIийи кьилелай фикир хъувунал ва гележегда вилик фин патал авай мумкинвилериз гьевеслудаказ килигунал гъана», — лугьузва Махачкъаладин 50-нумрадин мектебдин директордин меслятчи Рая Сайпулаевади.
Къейдзавайвал, 2024-йисуз Самарада кьиле фейи и форумда иштиракун патал уьлкведин вири регионрай 40 агъзурдалай гзаф жегьилри арзаяр агакьарнавай. Конкурсдай акъатай ва чпин яш 14 йисалай виниз тир 2000 гъалибчиди гьар жуьредин рекьерай тешкилнавай 11 сменада чирвилер хкажна. Тербиядин рекьяй пешекарар патал «Аялвилиз рехъ къалурзавайбур» подсмена тешкилнавай. Адан сергьятра аваз муаллимри жуьреба-жуьре мастер-классра, вебинарра ва интерактивра иштиракна. Сменадин нетижада мярекатдин иштиракчийри «Тербия. Рехъ туькIуьрнава» тelegram-бот кардик кутунва. Адай муаллимриз педагогикадин кIвалахдин 7 рекьяй методикадин материалар, алатар жагъида.
РикIел хкин, тербиядин ва аялрин жемиятдин кIватIалрихъ галаз санал кIвалахунин рекьяй директоррин меслятчияр Дагъустандин мектебра 2022-йисан 1-сентябрдилай пайда хьана. Гьисабзавайвал, цIийи къуллугъ кардик кутуни образование гунин гьерекатдихъ тербияламишунин жигьетдай авай мумкинвилер хъсанарун лазим тир.
«Ихтилат мектебра кIелзавай аялрихъ галаз са чIалал рахазвай ва тарсарилай кьулухъ азад вахт таъминарзавай — спортдин мярекатар, театрдиз, музейдиз фин, сада-садахъ галаз хуш рафтарвал авун тешкилзавай педвуздин выпускникдикай физва», — цIийи къуллугъчийрин везифайриз талукь яз лагьанай а чIавуз РФ-дин просвещенидин министр Сергей Кравцова.
ЦIийи муаллимриз чирвилер ва вердишвилер гунал Россиядин аялвал, хизан ахтармишунин ва тербиядин институт, Россиядин школайра кIелзавай аялрин гьерекат, Жегьилрин алем ахтармишунин ва социальный сетра гуьзчивал авунин Центр, гьакIни аялрин международный «Артек» центр машгъул я.
«Программадин бинеда «Образование» милли проектди вилик эцигнавай месэлаяр ава. Ихтилат Россиядин Федерациядин халкьарин руьгьдинни эдебдин ерийрал бинеламиш хьана, дуьзгуьн ва яшайишдин жигьетдай жавабдар инсан тербияламишуникай физва», — гьисабзава аялрин международный «Артек» центрадин директор Константин Федоренкоди.
Амина Муслимова
